तिताेपाटी – कोरोना भाइरसको आशंकामा सरुवा रोग अस्पताल टेकु र पाटन अस्पताल भर्ना भएका ६ जना डिस्चार्ज भएका छन् । आइसोलेसन वार्डबाट डिस्चार्ज भएकामध्ये पाँचजना घर गएका छन् । एकजनालाई सामान्य वार्डमा राखिएको डा. अनुप बाँस्तोलाले बताए । उनीहरू सबैको कोरोना रिपोर्ट नेगेटिभ आएको थियो । सरुवा रोग अस्पताल टेकुमा चार र पाटन अस्पतालमा दुईजना भर्ना भएका थिए ।
सरकारले मेडिकल कलेजहरूसँग पनि सहयोग मागेको छ । कोरोना भाइरसका बिरामी देखिएको अवस्थामा कति संख्यामा शय्या उपलब्ध गराउन सक्ने क्षमता छ भन्दै जानकारीसमेत माग गरेको छ । शिक्षा र स्वास्थ्य मन्त्रालयले छलफल गरी मेडिकल कलेजहरूको सहयोग माग्ने बताएका हुन् । ६ चैतदेखि सुरु हुने एसइई परीक्षाका लागि तय गरिएका १९९४ सेन्टरमा हेल्थ डेस्क राख्ने निर्णय भएको छ ।
कोरोना देखिए २८ दिन आइसियूमा बस्नुपर्ने
कोरोना भाइरस संक्रमण देखिएका ८० प्रतिशत व्यक्तिमा सामान्य प्रकारको लक्षण देखिने चिकित्सकहरूको भनाइ छ । उनीहरू घरमा आराम मात्रै गरे पनि ठीक हुन्छन् । १५ प्रतिशतलाई आइसोलेसन वार्डको र ५ प्रतिशतलाई आइसियूसहित भेन्टिलेटरको आवश्यकता पर्छ ।
कोरोना उपचारमा संलग्न चिकित्सक डा. अनुप बाँस्तोलाका अनुसार गम्भीर अवस्थामा आइसियूमा भर्ना भएका बिरामी कम्तीमा २८ दिनसम्म बस्नुपर्ने हुन्छ । कोरोना उपचार गर्ने सरुवा रोग अस्पताल टेकुमा हाल चार शय्याको आइसियू सञ्चालन छ । कम्तीमा दश शय्या थप गर्न सक्ने खाली ठाउँ छ ।
दैनिक १४ सयको परीक्षण गर्ने क्षमता रहेको केन्द्रीय प्रयोगशालाको दाबी : कोरोना भाइरस परीक्षण गर्ने दक्ष जनशक्ति भने ६ जना मात्रै
राष्ट्रिय जनस्वास्थ्य प्रयोगशालाले दैनिक १४ सय नमुना परीक्षण गर्न सक्ने क्षमता आफूसँग भएको बताएको छ । सरकारले कोरोना भाइरस परीक्षण गर्ने अधिकार राष्ट्रिय जनस्वास्थ्य प्रयोगशालालाई मात्रै दिएको छ । प्रयोगशालाकी निर्देशक डा. रुणा झाले दैनिक १४ सयसम्म नमुना परीक्षण गर्न सकिने जानकारी दिइन् । तर, कोरोना भाइरस परीक्षण गर्ने जनशक्ति भने प्रयोगशालासँग ज्यादै न्यून रहेको उनको भनाइ छ ।
सरकारले विशेषज्ञ जनशक्तिको व्यवस्थापन नगरे क्षमताअनुसार नमुना परीक्षण गर्न प्रयोगशाला असमर्थ हुने झाले बताइन् । हाल ६ जना जनशक्तिको भरमा प्रयोगशालाले सेवा दिइरहेको उनी बताउँछिन् । ‘प्रयोगशालामा कर्मचारीको संख्या धेरै भए पनि भाइरस परीक्षण गर्ने छुट्टै परीक्षणविज्ञ हुन्छन् । त्यस्ता दक्ष जनशक्तिको भने अभाव छ,’ डा. झाले भनिन् ।
यदि कोरोना संक्रमण फैलिएमा परीक्षणका लागि कर्मचारीको व्यवस्थापन पहिलो आवश्यकता भएको उनले बताइन् । ‘भएका कर्मचारीले पनि जोखिममा काम गरेबापत कुनै सेवासुविधा पाएका छैनन्,’ झाले भनिन् । ६ जना जनशक्तिले पनि कम्तीमा तीन सयको संख्यामा नमुना परीक्षण गर्न सक्ने उनको भनाइ छ ।
उपचार गर्न के–के गरिँदै छ ?
कोरोना भाइरसको परीक्षण अभाव हुन नदिन सरकारले आठ हजार किट (प्राइमर प्रोब) खरिद प्रक्रिया अघि बढाएको छ । हाल १४ सयको संख्यामा प्राइमर प्रोब मौज्दात छ । परीक्षण अवरुद्ध नहोस् भनेर स्वास्थ्यकर्मीको पर्सनल प्रोटेक्टिभ इक्युप्मेन्ट आवश्यकताअनुसार राखिएको स्वास्थ्य तथा जनसंख्या मन्त्रालयले जनाएको छ ।
कोरोना परीक्षणमा पहिलो रिपोर्ट इन्फ्लुएन्जा हेरिन्छ, इन्फ्लुएन्जा नेगेटिभमा कोरोना हेरिन्छ । एउटा मात्रै ल्याबले परीक्षण सम्भव नहुने भन्दै विश्व स्वास्थ्य संगठनबाट मान्यता प्राप्त केही ल्याबलाई पनि कोरोना परीक्षणको अधिकार दिन सक्ने प्रयोगशालाले जनाएको छ ।
नयाँ पत्रिकाबाट साभार
