तितोपाटी – हलिउड टेलिभिजन सो ‘क्वान्टिको’को पछिल्लो श्रृंखलाबाट विवादमा तानिएकी बलिउड नायिका प्रियंका चोपडाले सन् २०१९ मा ‘अनफिनिस्ड’ नामक पुस्तक पाठकमाझ ल्याउने भएकी छन् । उनको यो पुस्तकमा हालसम्म नखुलाएका निजी कुरा सार्वजनिक गर्नेछन्।
समाचार अनुसार उनले आफ्नो सुरुवाती फिल्मी करियरदेखि अभिनयको शिखरमा पुग्दासम्मको यात्रालाई पुस्तकमा समेट्नेछिन् । अमेरिका र ब्रिटेनमा प्रकाशन हुने पुस्तक अमेरिकाको बैलेनटाइन बुक्सले बजारमा ल्याउनेछ । भारतमा पेन्गुइन रेन्डम हाउस प्रकाशक रहेको पुस्तकमा प्रियंकाका अभिनेत्री, निर्मात्री, सामाजिक कार्यकर्ता र युनिसेफको सद्भावना दूत हुँदाका अनुभव समेटिनेछन्।
बलिउडकी ‘देशी गर्ल’का रुपमा परिचित प्रियंका आफ्नो पुस्तकलाई लिएर निकै उत्साहित छिन् । ‘पुस्तक म जस्तै इमान्दार, रमाइलो, जोशिलो, बोल्ड र बिद्रोही हुनेछ । मैले आफ्नो भावनालाई कहिल्यै पनि खुलेर प्रस्तुत गर्न सकिनँ,’ प्रियंकाले भनेकी छन्, ‘तर अब म यो काम गर्न तयार भएको छु । यो पुस्तक महिलाका लागि प्रेरणाको स्रोत बन्नेछ । जीवनमा केही पनि कुरा मिल्दैन भन्ने सोच राख्ने महिलाका लागि मेरो पुस्तक प्रेरणाको स्रोत हुनेछ । मलाई जीवनमा सबै कुरा चाहिएको थियो । जुन कुरा अहिले मैले प्रमाणित गरिसकेको छु।’
केही समयअघि चर्चित स्तम्भकार भारती एस प्रधानले प्रियंकासँगको अन्तर्वार्तामा आधारित ‘दी डार्क हर्स’ पुस्तक लेखेकी थिइन् । यो पुस्तकमा पनि प्रियंकाका केही पर्दा पछाडिका कुरा बाहिरिएका थिए ।प्रियंकाले १८ वर्षको उमेरमा एक फिल्ममा अभिनेता बबी देओलको अपोजिटमा रहेर अभिनय गरेकी थिइन् । महेश मान्जरेकर निर्देशित यो फिल्ममा बबी प्रियंकाको नाकका कारण असहज महसुस गरिरहेका थिए । जसकारण बबीले फिल्मबाट हात झिकेपछि प्रियंकाले पनि यो फिल्म गुमाएकी थिइन् ।
