रुकुम पश्चिमको सानीभेरी गाउँपालिका–६ स्थित देउताखोलामा जिप दुर्घटना हुँदा २ जनाको मृत्यु भएको छ भने ९ जना घाइते भएका छन्। मृत्यु हुनेमा जिप चालक सुन्दर खड्का मगर र १६ वर्षीया प्रेमकला पुन रहेका छन्।
प्रहरीका अनुसार कोटगाउँबाट सिम्लीतर्फ जाँदै गरेको लु १ च ६०२९ नम्बरको जिप सडकबाट करिब ५० मिटर तल खसेको थियो। दुर्घटनाका बेला जिपमा चालकसहित १३ जना सवार थिए।
घाइतेमध्ये दुई जनालाई नेपाली सेनाको हेलिकोप्टरमार्फत सुर्खेत प्रादेशिक अस्पताल लगिएको छ भने अन्य घाइतेको सिम्लीस्थित स्थानीय अस्पतालमा उपचार भइरहेको छ। थप दुई जनाको हवाई उद्धारको तयारी पनि गरिएको प्रहरीले जनाएको छ।
दुर्घटनाको कारणबारे अनुसन्धान भइरहेको छ।
