नाइजरको राजधानी नियामीमा सत्तारुढ सैन्य सरकारविरुद्ध केही युवा सैनिकहरूले गरेको विद्रोहको प्रयास असफल भएको छ। सरकारी सुरक्षा बलले विद्रोह नियन्त्रणमा लिएपछि दर्जनौं सैनिक पक्राउ परेका छन् भने केहीको मृत्यु भएको बताइएको छ।
राज्य सञ्चालित टेलिभिजनका अनुसार विद्रोही सैनिकहरूले नियामी अन्तर्राष्ट्रिय विमानस्थल परिसरस्थित महत्वपूर्ण सैन्य अड्डामा कब्जा जमाउने प्रयास गरेका थिए। घटनाका क्रममा रातभर गोलीबारी र विस्फोट भएका थिए। पछि सरकारी सुरक्षाकर्मीले अड्डामाथि पुनः नियन्त्रण कायम गरेका छन्।
रक्षामन्त्री जनरल सलिफु मोडीले विद्रोही सैनिकहरूले केही वरिष्ठ अधिकारीलाई बन्धक बनाएको तथा संवेदनशील स्थानहरूमा आक्रमण गरेको बताएका छन्। सरकारले उक्त घटनालाई सैन्य अनुशासन उल्लंघनको गम्भीर घटना भनेको छ।
विश्लेषकहरूका अनुसार देशमा बढ्दो जिहादी आक्रमण, सुरक्षा चुनौती र सैनिकहरूको बढ्दो असन्तुष्टिका कारण विद्रोहको प्रयास भएको हुन सक्छ। सन् २०२३ मा सैन्य कू मार्फत सत्ता कब्जा गरेपछि पनि नाइजरको सैन्य सरकारले देशको सुरक्षा अवस्था सुधार गर्न नसकेको आलोचना हुँदै आएको छ।
यस घटनामा रूस समर्थित अफ्रिका कोर्प्स ले नाइजरका सरकारी सुरक्षाबललाई सहयोग गरेको बताइएको छ। रूसी अधिकारीहरूले विद्रोह नियन्त्रणमा सहयोग पुर्याएको दाबी गरेका छन्।
नाइजर, माली र बुर्किना फासो जस्ता साहेल क्षेत्रका मुलुकहरूमा पछिल्ला वर्षहरूमा सैन्य कू, राजनीतिक अस्थिरता तथा जिहादी हिंसा तीव्र बन्दै गएको छ।
