अमेरिका र इरानबीचको तनाव पुनः तीव्र बनेको छ। अमेरिकी अर्थमन्त्री स्कट बेसेन्टले वाशिङ्टनले इरानलाई टिकाइराख्ने “हरेक आर्थिक जीवनरेखा काट्ने” नीति अवलम्बन गर्ने बताउँदै तेहरानमाथि थप कडा आर्थिक प्रतिबन्ध घोषणा गर्ने संकेत दिएका छन्।
अमेरिकी चेतावनीको जवाफमा इरानका राष्ट्रिय सुरक्षा परिषद्का प्रभावशाली सदस्य मोह्सेन रेजाईले यदि अमेरिकाले “आर्थिक युद्ध” जारी राखे फारसको खाडीबाट हुने सम्पूर्ण तेल निर्यात रोक्न सकिने चेतावनी दिएका छन्। उनले अमेरिकी प्रतिबन्धलाई समर्थन गर्ने कुनै पनि राष्ट्रको कदमलाई इरानले “युद्धसरहको कार्य” मान्ने बताएका छन्।
क्षेत्रीय तनाव बढिरहेका बेला ओमानका विदेशमन्त्री सैयद बद्र अल–बुसाइदीले होर्मुज जलडमरूमध्यको अवस्थाबारे छलफल गर्न तेहरान भ्रमण गर्ने तयारी गरेका छन्। त्यस्तै, इरानी संसदको राष्ट्रिय सुरक्षा तथा विदेश नीति आयोगले होर्मुज हुँदै आवतजावत गर्ने जहाजहरूबाट सेवा शुल्क असुल गर्ने व्यवस्था समेटिएको विधेयकलाई समर्थन गरेको छ।
यसैबीच, मध्यपूर्वमा अर्को संकटग्रस्त क्षेत्र गाजामा इजरायली सैन्य कारबाही निरन्तर जारी छ। इजरायली सेनाले मगाजी शरणार्थी शिविर नजिकको गोदामसहित विभिन्न स्थानमा हवाई आक्रमण गरेको जनाइएको छ, जसबाट मानवीय क्षति भएको रिपोर्टहरू सार्वजनिक भएका छन्।
अमेरिका–इरानबीचको बढ्दो टकराव र गाजामा जारी हिंसाले मध्यपूर्वको सुरक्षा अवस्था थप जटिल बन्ने चिन्ता अन्तर्राष्ट्रिय समुदायले व्यक्त गर्न थालेको छ।
