भेनेजुएलाको राजधानी काराकासमा उष्णकटिबन्धीय मौसमी प्रणाली (ट्रपिकल वेभ–४०) का कारण शनिबार परेको भीषण वर्षाले व्यापक बाढी निम्त्याएको छ। एल भाले नदी उफ्रिँदा मुख्य राजमार्ग, सडक तथा आसपासका बस्तीहरू डुबानमा परेका छन्।
काराकास सरकारका प्रमुख नाहुम फर्नान्डेजका अनुसार केवल ४५ मिनेटको वर्षाले सामान्यतया दुई महिनामा पर्ने बराबर पानी खसालेको थियो। अत्यधिक वर्षापछि धेरै सवारीसाधन सडकमा फसेका छन् भने बाढीले रुख ढाल्नुका साथै विद्युत् लाइनहरूमा समेत क्षति पुर्याएको छ, जसका कारण केही क्षेत्रमा विद्युत् आपूर्ति अवरुद्ध भएको छ।
घटनापछि अधिकारीहरूले राजधानीका २२ वटै क्षेत्रमा विशेष उद्धार तथा आपत्कालीन टोली परिचालन गरेका छन्। ती टोलीहरू सडक सफा गर्ने, ढलेका रुख हटाउने, ट्राफिक व्यवस्थापन गर्ने तथा प्रभावित नागरिकको उद्धार कार्यमा सक्रिय रहेका छन्।
मौसमविद्हरूले देशका अधिकांश क्षेत्रमा अझै भारी वर्षा र चट्याङसहितको मौसम जारी रहने चेतावनी दिएका छन्। लगातारको वर्षा र प्राकृतिक विपत्तिले यसअघि नै कमजोर बनेको पूर्वाधारमाथि थप दबाब सिर्जना गरेको अधिकारीहरूले बताएका छन्।
