अमेरिकी राष्ट्रपति डोनाल्ड ट्रम्पले अमेरिका र इरानबीच पूर्ण वार्ता नभई “आंशिक (semi-negotiating)” स्तरको संवाद मात्र भइरहेको बताएका छन्। उनले इरानमाथिको आर्थिक दबाब अझ बढ्दै जाने संकेत दिएका छन्।
इरानका विदेशमन्त्री अब्बास अराघचीले अमेरिका र इरानबीच प्रत्यक्ष वार्ता नरहेको स्पष्ट पार्दै होर्मुज जलडमरूमध्य अमेरिकाले इरानका मागहरू पूरा नगरेसम्म नखोलिने बताएका छन्। इरानले नौसैनिक नाकाबन्दी अन्त्य, प्रतिबन्ध हटाउने तथा अन्य सुरक्षा सम्बन्धी सर्तहरू अघि सारेको छ।
यसैबीच, इजरायली प्रधानमन्त्री बेन्जामिन नेतान्याहुले अमेरिका समर्थित गाजा शान्ति योजना औपचारिक रूपमा अस्वीकार गरेका छन्। उनले हमास पूर्ण रूपमा निःशस्त्र नभएसम्म इजरायली सेना गाजाबाट नफिर्ता हुने अडान दोहोर्याएका छन्।
यमनको अल-मखा बन्दरगाह क्षेत्रमा इरान समर्थित हुथी विद्रोहीहरूले गरेको आक्रमणमा कम्तीमा ७ जनाको मृत्यु भएको छ भने दर्जनौँ घाइते भएका छन्। घटनाले रेड सी क्षेत्रमा सुरक्षा चिन्ता थप बढाएको छ।
