तिब्बती स्वतन्त्रता आन्दोलनका सक्रिय अभियन्ता लोब्गा राङजेन (५२) ले संयुक्त राष्ट्रसंघ (यूएन) मुख्यालयअगाडि आत्मदाह गरेका छन्। तिब्बती समुदायका अनुसार उनले चीनको तिब्बत नीतिको विरोध गर्दै यो कदम चालेका हुन्।
लामो समयदेखि तिब्बती अधिकारका लागि सक्रिय राङजेनले घटनाअघि सार्वजनिक गरेको भिडियो सन्देशमा आफूले व्यक्तिगत कारणले नभई “तिब्बती राष्ट्रका लागि” संघर्ष गरिरहेको बताएका थिए। उनलाई तत्काल अस्पताल लगिए पनि करिब एक घण्टापछि मृत्यु भएको जनाइएको छ।
राङजेन अमेरिकामा आत्मदाह गर्ने पहिलो तिब्बती नागरिक भएको बताइएको छ। उनको निधनपछि तिब्बती समुदायले घटनास्थलमा श्रद्धाञ्जली अर्पण गर्दै स्वतन्त्रता र मानवअधिकारको पक्षमा आवाज उठाएका छन्।
