भारतको केरल राज्यमा लगातार परेको भारी वर्षाका कारण बाढी, पहिरो र जलमग्नताको समस्या गम्भीर बन्दै गएको छ। पछिल्ला तीन दिनमा वर्षासम्बन्धी घटनामा २० जनाको मृत्यु भएको छ भने ७ जना बेपत्ता रहेका छन्।
सबैभन्दा बढी क्षति कोट्टायम र मलप्पुरम जिल्लामा भएको छ, जहाँ ४/४ जनाको मृत्यु भएको छ। तिरुवनन्तपुरम र कोल्लम मा ३/३ जनाको ज्यान गएको छ। इडुक्कीमा २ तथा पथानामथिट्टा, कोझिकोड र एर्नाकुलममा १/१ जनाको मृत्यु भएको छ।
बाढी र पहिरोका कारण हजारौं मानिस विस्थापित भएका छन्। हाल राज्यभरका ३५३ राहत शिविरमा १३,४९६ जना आश्रय लिएर बसिरहेका छन्।
भारतीय मौसम विभाग (IMD) ले १२ जिल्लामा अरेन्ज अलर्ट जारी गरेको छ भने थप वर्षा र तीव्र हावा चल्ने चेतावनी दिएको छ। जलाशयहरूमा पानीको स्तर बढ्दै गएपछि केरल विद्युत् बोर्ड (KSEB) ले ५ वटा जलाशयलाई रेड अलर्ट मा राखेको छ।
