जलवायु परिवर्तनबाट प्रभावित भीषण डढेलोका कारण फ्रान्स र स्पेनमा ३ लाखभन्दा बढी मानिस विस्थापित भएका छन्। नयाँ स्थानान्तरण आदेश जारी भएसँगै प्रभावित क्षेत्रबाट मानिसहरूलाई सुरक्षित स्थानमा सारिएको छ। फ्रान्सको गिरोन्द (Gironde) क्षेत्रमा मात्रै बोर्डो आसपासका सहरबाट थप ५५ हजार मानिसलाई सुरक्षित स्थानमा सारिएपछि त्यहाँ घर छाड्नेहरूको संख्या २ लाख २० हजारभन्दा बढी पुगेको छ।
फ्रान्सको बोर्डो क्षेत्रमा करिब ७ हजार मानिसलाई आश्रय दिइएको छ, जुन दोस्रो विश्वयुद्धपछिको सबैभन्दा ठूलो स्थानान्तरण मानिएको छ। डढेलो नियन्त्रणका क्रममा फ्रान्समा कम्तीमा ६८ जना अग्निनियन्त्रक घाइते भएका छन्। यता, फ्रान्सको लान्द (Landes) क्षेत्रमा भने अवस्था केही सुधारिएसँगै बिस्कारोस (Biscarrosse) सहरका करिब ३ हजार बासिन्दालाई घर फर्किन अनुमति दिइएको छ।
स्पेनमा पनि नयाँ क्षेत्रहरूबाट मानिसहरूलाई स्थानान्तरण गरिएको छ। स्थानीय सञ्चारमाध्यमका अनुसार हालसम्म १ लाखभन्दा बढी मानिस विस्थापित भइसकेका छन्। स्पेनमा भने अग्निनियन्त्रकहरूले म्याड्रिड नजिकका दुईवटा डढेलो एकआपसमा मिसिन नदिन प्रयास गरिरहेका छन्।
युरोपका अन्य देशहरूमा पनि डढेलो फैलिरहेकाले चिन्ता बढेको छ। विज्ञहरूका अनुसार युरोप विश्वको सबैभन्दा तीव्र गतिमा तापक्रम बढिरहेको महादेश हो, जसका कारण यस वर्ष सामान्यभन्दा धेरै भूभाग डढेलोबाट प्रभावित भएको छ।
