थाइल्याण्डको राजधानी बैंककको बाहिरी क्षेत्रमा रहेको रोङ बियर ना लाट फ्राओ बार तथा रेष्टुरेन्टमा आइतबार राति भएको भीषण आगलागीमा कम्तीमा २७ जनाको मृत्यु भएको छ भने ६३ जना घाइते भएका छन्। घाइतेमध्ये २२ जनाको अवस्था गम्भीर रहेको बताइएको छ।
प्रारम्भिक अनुसन्धान अनुसार आगो स्टेज नजिकको विद्युत प्रणाली (सर्किट ब्रेकर) बाट सुरु भएको हुन सक्ने अनुमान गरिएको छ। आगो र धुवाँ तीव्र गतिमा फैलिएकाले धेरै मानिसहरू बाहिर निस्कन नसकी फसेका थिए। केही पीडितहरू आगलागीको बेला बाहिरिने बाटो नपाएर शौचालयतर्फ भागेका थिए।
उद्धारकर्ताहरूले भित्र टेबल र कुर्सीहरूले बाटो अवरुद्ध गरेको तथा केही स्थानमा स्पष्ट आपतकालीन निकास (fire exit) नदेखिएको बताएका छन्। घटनापछि अधिकारीहरूले आगलागीको कारण र सुरक्षा मापदण्डहरूको पालनाबारे विस्तृत अनुसन्धान सुरु गरेका छन्।
यो घटना सन् २००९ को सान्टिका क्लब आगलागी पछि थाइल्याण्डमा भएको सबैभन्दा घातक बार/नाइटक्लब आगलागी मानिएको छ। सरकारले पीडित तथा उनीहरूका परिवारलाई आवश्यक सहयोग र उपचार उपलब्ध गराउने जनाएको छ।
