विश्वको प्रमुख तेल उत्पादक राष्ट्र संयुक्त अरब इमिरेट्स (यूएई)ले आगामी मे १ देखि ‘ओपेक’ र ‘ओपेक प्लस’ दुवै संगठनबाट बाहिरिने घोषणा गरेको छ । साउदी अरबको नेतृत्वमा रहेको यो तेल संगठनका लागि वर्तमान मध्यपूर्वको तनाव बीच तेल कार्टेलमाथि दबाब बढ्दै जाँदा युएईले ओपेक छोड्नुलाइ दशकौँपछिको सबैभन्दा ठूलो संकट मानिएको सञ्चारमाध्यमहरूले जनाएका छन् । यो समूह पहिले नै होर्मुज जलडमरू हुँदै खाडी क्षेत्रबाट तेल निर्यात गर्ने चुनौतीसँग जुधिरहेको छ।
यूएईको ऊर्जा मन्त्रालयले जारी गरेको विज्ञप्तिमा भनिएको छ, “यो निर्णय हाम्रो देशको दीर्घकालीन रणनीतिक र आर्थिक सोच अनुरूप लिइएको हो । हामी अब आफ्नो आन्तरिक ऊर्जा क्षमता अभिवृद्धि र उत्पादनमा व्यापक लगानी गर्न चाहन्छौँ । हामी विश्व बजारमा एक जिम्मेवार र भरपर्दो ऊर्जा साझेदारको रूपमा रहिरहनेछौँ ।”
यूएईले संगठनबाट बाहिरिए पनि बजारको मागअनुसार विस्तारै तेल उत्पादन बढाउने र गैरजिम्मेवार कदम नचाल्ने स्पष्ट पारेको छ ।
सन् २०२६ को तथ्यांकअनुसार यूएई, साउदी अरब र इराकपछि ओपेकको तेस्रो ठूलो उत्पादक हो । यसले दैनिक करिब ३० लाख ब्यारेल तेल उत्पादन गर्छ ।
