तितोपाटी- नेपाली कांग्रेसका एक समूहले धुम्बाराहीको स्मार्ट होटलमा भेला आयोजना गर्यो । देउवा पक्षीय नेताको उक्त भेलामा समसामयिक घटनाक्रमको ब्रिफिङ गर्दै कांग्रेस नेता पूर्ण बहादुर खड्काले कांग्रेसको हारको कारण नै विशेष महाधिवेशन भएको बताएका छन ।
‘सिंगो पार्टी एकढिक्का भएर चुनावमा जान पाएको भए पहिलो पार्टी रास्वपा नै बनेपनि ७० कांग्रेसको आउथ्यो,’ खड्काले भने, ‘अहिलेकै चुनावको उम्मेदवारको अवस्थामा पनि हामी ५०/६०मा पुग्थ्यौं । चुनावको परिणाम अर्कै हुन्थ्यो । आज जे भोग्नुपर्यो देशले त्यो भोग्नुपर्ने थिएन ।’
यसैले पार्टी चुनावी हारको मूल कारण विशेष महाधिवेशन गर्ने नेताहरूकै जिम्मामा रहेको उनले आरोप लगाए । ‘त्यही विशेष महाधिवेशन नै कांग्रेसका लागि चुनावको गाह्रो बन्यो । चुनावमा नेपाली कांग्रेसको जुन दुर्गति भएको छ, त्यसको मूल कारण विशेष महाधिवेशन हो,’ उनले भने ।
विशेष महाधिवेशन र नियमित महाधिवेशनको मुद्दामा तत्कालीन महामन्त्रीद्वय गगन थापा र विश्वप्रकाश शर्माले आफ्नै वचन तोडेर धोका दिएको पनि उनले बताउदै त्यसको साक्षी तत्कालीन केन्द्रीय सदस्य रमेश लेखक रहेको उनको भनाइ थियो ।
पार्टीलाई एकताबद्ध बनाउन सहमतिको खाका नेतृत्वले ल्याउनुपर्ने उनको भनाइ थियो। नियमित महाधिवेशन गराउन विशेष महाधिवेशनबाट आएको अहिलेको केन्द्रीय समिति र १४ औं महाधिवेशनबाट निर्वाचित केन्द्रीय समितिलाई मिलाउनुपर्ने, १५ औं महाधिवेशन गर्न आयोजक समिति बनाउनुपर्ने, क्रियाशील व्यवस्थापनदेखि निर्वाचन समितिसम्ममा सबै पक्षको प्रतिनिधित्व हुनुपर्नेमा खड्काको जोड थियो ।
कांग्रेसमा यतिबेला तिन समुह संक्रिय रहेको छ जसमा शेखर गुट, पूर्ण बहादुर खड्का गुट र बिशेष महाधिबेशनबाट आएको सभापति गगन थापाको समिति । सर्वोच्चबाट गगन थापाले नेतृत्व आधिकारिक मान्यता पाए पनि शेखर र खड्काले आफ्नो आफ्नो समुहको गुट भेला गर्दै आएका छन ।
