सुडानका लगातारको भारी वर्षापछि गएको पहिरोमा परि १ हजार जना भन्दा बढिको ज्यान गएको छ । गत अगष्ट ३१ मा गएको पहिरोको कारण सिंङ्गो गाउँ नै सखाप भएर गाउँका एक जना मानिस मात्रै बाँच्न सफल भएको खबर छ ।सूडानको विद्रोही संगठन सूडान लिबरेशन मुभमेन्ट/आर्मीले पश्चिमी क्षेत्रमा पहिरो गएर सो संख्यामा मानिसहरूको हताहत भएको जनाएको हो ।
आइतबार पहिरो गएर उक्त संख्यामा मानिसहरूको हताहत भएपछि विद्रोही संगठनले संयुक्त राष्ट्र संघ र अन्य क्षेत्रीय तथा अन्तर्राष्ट्रिय संस्थाहरूबाट मानवीय सहयोगको लागि अपील गरेको छ।
सुडानी सेना र अर्धसैनिक र्यापिड सपोर्ट फोर्सेस (RSF) बीचको युद्धपछि उत्तरी डार्फर राज्यका धेरै बासिन्दाहरूले मारा पर्वत क्षेत्रमा शरण लिएका थिए।
सुडानमा अप्रिल २०२३ मा सुडानी सेना र आरएसएफ बीच सुरु भएको गृहयुद्धले देशलाई अनिकालमा डुबायो र पश्चिमी डार्फर क्षेत्रमा नरसंहारको आरोप लागेको छ जहाँ डेढ लाख भन्दा बढि मानिसहरू मारिएको अनुमान गरिएको छ भने करोडाैं मानिसहरू घर छोडेर भागेका छन् ।
