पाकिस्तानको दक्षिणी बन्दरगाह सहर कराँचीमा विगत तीन दिनदेखि अत्यधिक रूपमा तापक्रम बृद्धिका कारण कम्तीमा २५ जनाको मृत्यु भएको र हजारौँलाई अस्पतालमा भर्ना गरिएको उद्धार टोली र स्थानीय सञ्चारमाध्यमले जनाएका छन् ।
उच्च तापक्रमका कारण धेरै बिरामीहरूमा पानीको मात्रा कम भएको र प्राथमिक उपचारपछि डिस्चार्ज गरिएको चिकित्सकहरूले बताएका छन् ।यद्यपि, मुटुको रोग र क्यान्सर जस्ता दीर्घरोग भएका केही व्यक्तिलाई थप उपचारका लागि अस्पतालमा राखिएको स्थानीय सञ्चार माध्यमले जनाएको छ ।
कराचीमा अधिकतम् ४१ डिग्री सेल्सियस (१०५.८ डिग्री फरेनहाइट) तापक्रम रेकर्ड गरिएको थियो। गत महिना पाकिस्तानको दक्षिणी प्रान्त सिन्धमा तापमान ५२.२ डिग्री सेल्सियस (१२५.६ डिग्री फरेनहाइट) भन्दा माथि पुगेको थियो ।
