फेसबुकको माउ कम्पनी मेटाका संस्थापक मार्क जुकरबर्गले धनको मामिलामा टेस्लाका मालिक एलन मस्कलाई पछि पारेका छन् । जुकरबर्ग मस्कलाई पछि पार्दै विश्वको तेस्रो धनी व्यक्ति बन्न सफल भएका छन् । जुकरबर्गले सन् २०२० पछि यो स्थान हासिल गरेका हुन् ।
ब्लुमबर्ग बिलिनियर्स सूचीका अनुसार एलन मस्क १८१ बिलियन डलर नेटवर्थका साथ विश्वको धनाढ्यको सूचीको चौथो स्थानमा झरेका छन् । मार्च महिनाको सुरुवातमा मस्क पहिलो स्थानमा थिए ।
मार्क जुकरवर्गको सम्पत्ति भने १८७ बिलियन डलर पुगेको छ ।
यो वर्ष एलन मस्कको सम्पत्तिमा ४८.४ बिलियन डलरको गिरावट आईसकेको छ । उता जुकरबर्गको सम्पत्ति भने ५८.९ बिलियन डलरले वृद्धि भएको छ ।
हालै मात्रै टेस्लाले कम मूल्य भएका कार ल्याउने योजना रद्द गरेको जनाएको थियो । जसपश्चात कम्पनीको सेयरमूल्यमा गिरावट देखिएको छ । यस्तै यो वर्षको पहिलो ३ महिनामा टेस्लाको कार डेलिभरीमा पनि गिरावट आएको खबर बाहिरिएको थियो । जसपश्चात कम्पनीको सेयरमूल्य घट्न पुगेको छ ।
यो वर्ष टेस्लाको सेयरमूल्यमा ३३.६२ प्रतिशतको गिरावट आईसकेको छ । अमेरिकी सेयर बजार एसएण्ड पी ५०० इन्डेक्समा यो वर्ष सबैभन्दा खराब प्रदर्शन गर्नेमा टेस्ला अग्र स्थानमा रहेको छ ।
टेस्लाको विपरित मेटाको सेयरमूल्यमा यस वर्ष ५२.२८ प्रतिशतको उछाल आएको छ । एसएण्ड पी ५०० इन्डेक्समा यो वर्ष सबैभन्दा राम्रो प्रदर्शन गर्नेमा मेटा ५ औं स्थानमा छ ।
यो सूचीको शीर्ष १० मा भारतका कुनै पनि धनाढ्य अटाउन सकेका छैनन् । रियालयन्स इन्डस्ट्रिजका अध्यक्ष मुकेश अम्बानी विश्वको धनाढ्यको सूचीमा ११ औं स्थानमा झरेका छन् । उनको कुल सम्पत्ति ११२ बिलियन डलर छ ।
त्यस्तै अर्का भारतीय धनाढ्य गौतम अडाणी सूचीको १४ औं स्थानमा छन् । उनको कुल सम्पत्ति १०४ बिलियन डलरबराबर छ ।
विश्वको धनाढ्यको पहिलो स्थानमा भने बनार्ड अर्नल्ड छन् ।
