भारतको गुजरातस्थित अहमदावादमा १३ वर्षअघि ५६ जनाको मृत्यु हुने गरि गराइएको श्रृङ्खलावद्ध बम विस्फोटको घटनामा दोषी ठहरिएका ३८ जनालाई गुजरात स्थित विशेष अदालतले मृत्युदण्डको फैसला सुनाएको छ । २०० जना भन्दा बढी मानिस घाइते हुने गरि सन २००८ मा भएको सो घटनामा संलग्न भई दोषी ठहरिएका उनीहरूलाई अदालतले शुक्रबार मृत्युदण्डको फैसला सुनाएको हो ।
उक्त घटनामा दोषी दाबी गरिजेल चलान गरिएका ४९ जनामध्ये ३८ जनालाई मृत्युदण्डको फैसला सुनाइएको छ भने बाँकी ११ जनालाइ आजीवन कारावासको सजाय तोकिएको छ तर दोषी ठहरिएका सबैले उक्त फैसलाविरुद्ध उच्च अदालतमा पुनरावेदन गर्न पाउने विकल्प भने अझै पनि बाँकी नै रहेको बताइएको छ ।
अहमदाबाद बमकाण्डमा जम्मा ७८ जनाविरुद्ध मुद्दा चलाइएको थियो । २८ जनालाई भने अदालतले सफाइ दिइसकेको छ । उनीहरूले सन् २००८ को जुलाई २६ मा ७० मिनेटको अवधिमा आवासीय क्षेत्र, बजार, सार्वजनिक यातायात, अस्पताल लगायत क्षेत्रमा २१ बम विस्फोट गराएका थिए । सो समयमा श्रृङ्खलावद्ध बम विस्फोट लगत्तै प्रहरीले गरेको सर्च अपरेसनमा गलत सर्किट जोडिएका कारण विस्फोट नभएका अरू २९ वटा बम प्रहरीले वरामद गरेको थियो ।
