फेब्रुअरी २० देखि कोभिड विरूद्धको पूर्ण मात्रा खोप लगाएकाहरूले कुवेत आउँदा पीसीआर गर्नु नपर्ने

तीतोपाटी – कुवेत सरकारको मन्त्रिपरिषद्को साप्ताहिक बैठकले कोरोना भाइरस (कोभिड–१९) विरुद्ध पूर्ण खोप लगाएका व्यक्तिलाई स्वदेश आउनुअघि र कुवेत आइसकेपछि पीसीआर परीक्षण गराउन र होम क्वारेन्टाइन बस्न नपर्ने निर्णय गरेको छ । सो निर्णय यहि फेब्रुअरी २० तारिकदेखि लागु हुने जनाइएको छ । सो कुरा सरकारका प्रवक्ता तारिक अल-मजरामले पत्रकार सम्मेलनमार्फत जानकारी गराएका हुन् ।

सरकारका प्रवक्ता तारिक अल-मजरामलाइ उद्धत गर्दै अरब टाइम्समा प्रकाशित समाचार अनुसार नयाँ यात्रा प्रक्रिया अनुसार पूर्ण खोप नभएकाहरूलाई कुवेतको लागि उडानमा चढ्नु अघि ७२ घण्टा भित्रको पीसीआर नेगेटिभ परीक्षण आवश्यक हुनेछ। आइपुगेपछि ७ दिन होम क्वारेन्टाइन, ७ दिन पछि क्वारेन्टाइनबाट बाहिर निस्कन पीसीआर टेस्ट नेगेटिभ हुनु पर्नेछ ।

कुवेतको स्वास्थ्य मन्त्रालयले स्वीकृत बुस्टर डोज प्राप्त गरेकाहरूलाई पूर्ण रूपमा खोप लगाइएको मानिनेछ भने अन्य अबस्थामा पूर्ण खोप लगाएको मानिने छैन ।

उपरोक्त निर्णय कुवेत भित्रिने यात्रुहरूका लागि लागु हुने भए पनि कुवेतबाट छुट्टीमा जानेहरूका बारेमा भने पीसीआर गर्नु पर्ने वा नपर्ने केही पनि जनाइएको छैन ।