तीतोपाटी, काठमाडाैं – ग्रिस जाने क्रममा सवारी साधन दुर्घटनामा परी ज्यान गुमाएका २ नेपालीको शव काठमाडौं ल्याइएको छ । मंसिरको पहिलो साता टर्कीबाट गैरकानूनी रुपमा युरोप प्रवेश गर्ने क्रममा ग्रीसको सीमा नजिकै गाडी दुर्घटना हुँदा ४ जना नेपालीको ज्यान गएको थियो ।
नेपाल सरकारको श्रमिक कल्याणकारी कोषबाट गौरीगंगा नगरपालिका–४ कैलालीका लक्ष्मण सापकोटा र भिमेश्वर नगरपालिका–६ दोलखाका राजु लामाको शव बुधबार अपरान्ह काठमाडौं ल्याइएको हो ।
कैलालीका लक्ष्मण सापकोटाको शव विमानस्थलमा बुझेर कैलाली लाँदै गरिएको मृतकका भतिज गणेश सापकोटाले बताए ।
दोलखाका राजु लामाको भने काठमाडौंको स्वयम्भूमा अन्त्येष्टि गरिने मृतकका भाई अमर लामाले बताए ।
उक्त सडक दुर्घटनामा मृत्यु भएका आमाछोदिङमो गाउँपालिका–३ रसुवाकी शर्मिला तामाङ भनिने रमिला घले र घिरिङ गाउँपालिका–५ तनहुँका ओमबहादुर थापाको शव ल्याउन भने गैरआवासीय नेपाली संघ (एनआरएन)ले ७ हजार २ सय यूरो संकलन गरेर ग्रीस पठाइएको छ ।
उनीहरूको शव नेपाल ल्याइने प्रकृया अन्तिम चरणमा पुगेको एनआरएनए टर्किका अध्यक्ष उज्वल कुमार घिसिंङले बताए ।
