तीतोपाटी, काठमाडौं- फिनल्याण्ड पठाइदिन्छु भनी रकम ठगी गर्ने २९ वर्षीय अमित थामी पक्राउ परेका छन् । महानगरीय अपराध महाशाखाको टोलीले उनलाई काठमाडौंको गौरीघाटबाट पक्राउ गरेको हो ।
पक्राउ परेका थामीले फिनल्याण्डमा सेक्युरिटी गार्डको प्रकृया शुरु गराउन शम्भु घले संग १ लाख ५० हजार आफ्नै बैंक खातामा मगाएका थिए । त्यसै गरी थामीले फिनल्याण्ड जाने भिषा, होटल बुकिङको कागज लगायत हवाई टिकट समेत पठाई घले संग पटक-पटक गरी बैक खातामा २१ लाख जम्मा गर्न लगाएको बताइएको छ ।
थामीले पैसा लिए पश्चात मोबाईल अफ गरी सम्पर्कविहिन भएका थिए । आफू ठगीमा परेको आशंका लागि घलेले कागजातहरूको सम्बन्धमा एयरपोर्टमा गई चेकजाँच गराउदा सबै कागजातहरू नक्कली रहेको प्रमाणित भएको थियो ।
पीडित शम्भु घले सहित अन्य पाँच जनाले थामी बिरुद्द महानगरीय अपराध महाशाखामा ठगीको मुद्दा दर्ता गराएका थिए ।
