तीतोपाटी डटकम-आर. बी. बुढाथोकी-काडे खुर्मा रोटी पछिल्लो समय निकै चर्चामा छ । बच्चालाई टिफिन होस् या फुर्सदमा चिया कफीको साथी यो रोटी धेरैको रोजाइमा परेको छ ।
स्कूल कलेजको क्यान्टिनमा पनि खुर्मा रोटी धेरैले रुचाउँछन् । फुर्सदमा बनाएर व्यस्त समयमा खान पनि यो उपयोगी छ । तिहारको भाइटीका भागको थालीमा पनि खुर्मा रोटी धेरैले प्रयोग गर्न थालेका छन् ।
काँडे खुर्मा रोटी बनाउन चाहिने सामग्रीः
मैदा १ कप आधा, चामलको पिठो १ कप, सुजी आधा कप, घ्यू टेबल चम्चा, चिनी ३ टेबल चम्चा, दुक्मेल या दालचिनीको धुलो पिन्च (एज अ फ्लेबर एजेन्ट), दूध पाउडर २ टेबल चम्चा, पानी डो बनाउन आवश्यकता अनुसार, घ्यू तेल फ्राई गर्न पुग्ने ।
काँडे खुर्मा रोटी बनाउने तरिकाः
दिएका तीनै थरि पिठो, घ्यू, दूध, पाउडर, चिनी र दुक्मेलको धुलो हाली मज्जाले माड्ने । आवश्यकता अनुसार पानी हाल्दै मुछ्दै जाने र नरम डो तयार हुनासाथ २० मिनेट छोपेर राख्ने । सानो–सानो गोलो डल्लामा डो काट्ने र तस्वीरमा देखाएझैं काटा वा खुर्मा रोटीको साँचोमा राखेर सेभ दिने ।
१/१ गरी सबै बनाइसकेपछि घ्यू र तेल मिसाएर मध्यम आचमा तताउने र प्रि बनाएको खुर्मा रोटीलाई फ्राई गर्ने । पल्टाइ–पल्टाइ राम्ररी पाक्न दिने । अन्त्यमा गोल्डन ब्राउन हुनासाथ यो तयार हुन्छ । निकालेर हेर्दा यो खुर्मा रोटीमा चामल र सुजीको पिठोका कारण राम्रा काँडा देख्न सक्नुहुन्छ र अझ साँचोले दिएको सेभ त झन् सुन्दर हुन्छ । यो रोटीलाई चास्नीमा डुबाएर मिठाइको रूपमा पनि प्रयोग गरिन्छ ।
यसरी पाकेर झुरुम–झुरुम भएको खुर्मा रोटी ‘एयर टाइट’ डब्बामा राखेर लामो समयसम्म पनि चिया या कफीसँग स्न्याक्सको रूपमा पाहुनालाई सर्भ गर्न सकिन्छ । तिहारमा विभिन्न फूड कलर प्रयोग गरेर खुर्मा रोटीलाई रङ्गीचङ्गी बनाउने चलन पनि छ ।
दि सोल्टी होटल काठमाडौंमा ‘सुसेफ’को रूपमा कार्यरत बुढाथोकी पाककला र सन्तुलित आहारका विषयमा कलम चलाउँछन् ।
