बिहान उठि, कोदाली छोपी, वारी र खेतमा
गर्नु छ कर्म, नमानी सर्म,चुह्याई पसिना ।।
नेपाल प्यारो पवित्र देश उमंग भरेर,
फेर्नु छ भेष नेपाली केश संघर्ष गरेर ।।१।।
न गरी खान कस्लाई छ र हामी त किसानी
फलाई अन्न खानु है टन्न यहीँ छ निसानी ।।
देशको माया मुटुको माझ बोकेर हिड्नेछौँ
लडाइ लड्न तत्पर सधैं खुकुरी भिर्नेछौँ।।२।।
बाँच्नलाई त चाहिन्छ अन्न भण्डार थाहा छ
हामी त पर्यौँ किसान हेर्नु मुटुमा माया छ।।
जिन्दगी जान्छ हातमा फोरा उठ्दछ व्यसरी
संघर्ष गरी बढेका हुन्छौं जसरी त्यसरी ।।३।।
धानका बाला खेतमा झुले असोज महिना
कृषक हामी नेपाली सबै बढायौँ गरिमा ।।
लाग्दछ घाम पर्दछ पानी समय हिड्दछ
जे जस्तो भए पनि त सधैं किसान भिड्दछ ।।४।।
रिता खराल, रुपन्देही
गैडहवा-९ ,रुपन्देही
