सूत्र -sss iis isi iis ssi ssi s
तानाशाह चलेछ गाउँ घरमा, राजा ढलाए पनि ।
कोही हाँस्न सकेन बाहिर सदा, सत्ता चलाए पनि ।
छिर्छन् गाउँ चुनाव हुन्छ जब, यी गर्छौं बिकासै भनी ।
आफ्नो स्वार्थ लुटेर जान्छ सहजै, पुत्ला जलाए पनि ।
पैसा आउँछ खै विकास नहुने, कस्तो व्यवस्था बन्यो ।
गर्दैनौ कहिल्यै हिसाब किन हो, कस्ले नगर्नू भन्यो ।
जागेनन् कमरेड मस्त कहिल्यै, बाजा बजाए पनि ।
छाडेनन् लुटपाट गर्न, यिनको पुत्ला जलाए पनि ।
तानातान गरेर देश यिनले, खोक्रो बनाई सके ।
भ्रष्टाचार बढ्यो सधैं मुलुकमा, बस्ती गनाई सके ।
जान्छन् पात चुढेर आज किन हो, काया पलाए पनि ।
कोही पुग्न सकेन है महलमा, पुत्ला जलाए पनि ।
ठूलो भाग मिलेन खान कि कसो, नेता लड्यौ खै किन ।
कोही छुट्नु हुँदैन पुग्न पदमा, नाता र गोता गिन ।
आफ्नो सोच पुरा गरे सहरमा, नेता हुँ ठूलै भनी ।
केही दाल गलेन है हजुरको, पुत्ला जलाए पनि ।
माग्दै भोट चुनाव गर्ने रहर त्यो, कस्तो मजाकै भयो ।
लाटा छन् जनता अझै मुलुकमा, भन्ने जमाना गयो ।
खाए देश सबै मिली कुकुरले, ग्वाम्मै ढलाए पनि ।
जाऊ पिण्ड घिचेर बस्नु घरमा, पुत्ला जलाए पनि ।
