तीतोपाटी – भारतको मध्य प्रदेश राज्यको सिधी जिल्लामा मंगलबार बिहान एक यात्रुवाहक बस दुर्घटना हुँदा कम्तीमा ४७ जनाको मृत्यु भएको छ । बसमा ५४ जना यात्रु रहेको र नहरमा खसेका सात जना यात्रुहरु भने पौडेर बाँच्न सफल सफल भएका छन् । सो दुर्घटना सडक जाम भएको कारण चालकले बाटो बदलेर जान खोज्दा भएको बताइएको छ ।
भारतीय सञ्चारमाध्यमहरुका अनुसार सिधीबाट सतना गइरहेको बस मध्य प्रदेशको राजधानी भोपालबाट करिब ५ सय ६० किलोमिटर टाढा रामपुर नैकिनमा बिहान करिब साढे आठ बजे पुलबाट तल वाणसागर परियोजनाको नहरमा खसेको थियो । सडकमा साइड लगाउने क्रममा पुलबाट तल नहरमा खसेको बताइएको छ ।
दुर्घटनाको खबरसँगै राज्य सरकारले मंगलबारका लागि निर्धारित सबै महत्वपूर्ण कार्यक्रमहरु रद्द गरेको थियो भने दुर्घटना पश्चात मृतकका परिवारलाइ जनही ५ लाख दिने निर्णय गरेको छ । त्यस्तै केन्द्रिय सरकारले राष्ट्रिय राहतकोषबाट मृतकका परिवारलाइ २ लाख र घाइतेलाइ ५० हजार दिने निर्णय गरेको छ ।