नारीलाई खेलौना झैं नठान ए लोग्नेमान्छे ।
राज्यको दोस्रो दर्जा झैं नमान ए लोग्नेमान्छे ।।
नारी बिना तिम्रो अस्तित्व नै सम्भव नहुँदा
दिनदिनै कोपिलालाई छुरा नहान ए लोग्नेमान्छे ।।
कुनै पनि क्षमताको कमी नै छैन नारीमा
अवसरको चाल्नीमा नछान ए लोग्नेमान्छे ।।
एक्काइसौं शताब्दीको वैज्ञानिक युग हो यो
सति प्रथाको जमानामा नतान ए लोग्नेमान्छे ।।
नारी हक अधिकारका ठूलाठूला भाषण त छाँट्छौ
तर घरकै नारी मनसँग छौं अन्जान ए लोग्नेमान्छे ।।
-धर्मिला कार्की
इनरुवा-६, सुनसरी
हाल: महाराजगञ्ज, काठमाडौँ
