तीतोपाटी – नेपालीहरूको सबैभन्दा ठुलो चाडको रूपमा मानिएको बडा दसैं यस वर्ष कोरोना महामारीको कारण त्यति उल्लासमय बनेन ।राष्ट्रपति विद्यादेवी भण्डारीले राष्ट्रपति निवास शीतल निवासमा विजयादशमीका अवसरमा आज गुरु खेमचन्द्र ढकाल र आमा मिथिला पाण्डेका हातबाट १० बजेर १९ मिनेटको शुभसाइतमा टीका र जमरा लगाइन् ।
त्यसै गरि प्रधानमन्त्री केपी शर्मा ओलीले राष्ट्रपति भण्डारीको हातबाट दसैँको टीका लगाएका छन् । सोमबार दिउँसो प्रधानमन्त्री ओली दसैँको टीका लगाउन राष्ट्रपति निवास शीतलनिवास पुगेका थिए । त्यस क्रममा राष्ट्रपति भण्डारीले प्रधानमन्त्रीलाई टीका र जमराको माला लगाइदिएकी थिइन् । यसपालि प्रधानमन्त्री ओलीका बुबा झापामा रहेकोले प्रधानमन्त्री स्वयंले आफ्ना बुबासँग टीका लगाउन पाएनन् ।
भिभिआइपी मात्रै नभएर सर्वसाधारणका घर घरमा पनि यस पालिको दसैंमा राैनक छाएन । परदेशमा रहने त परदेशमै रहे स्वदेशमै रहेकाहरू पनि परिवारजन र इष्टिमित्रसँग भेटघाट गर्न जान पाएनन् ।
नेपाली समाजमा अरू समयमा सम्भव नभए पनि वर्षको एक पटक मान्यजनका घरघरमा गएर मान्यजनबाट टीका, जमरा र अाशिर्वाद ग्रहण गर्ने यो परम्परा यस वर्ष भने कायम रहन सकेन । कोरोना संक्रमणको त्रासको कारण जो जहाँ छन् त्यहीँबाट दसैं मनाउन सरकारले उर्दी नै जारी गरे पछि राष्ट्रप्रमुख देखि सर्वसाधारणले सामान्य रूपमा दशैं मनाए ।
वर्षको एक पटक खुल्ने तलेजु भवानीको मन्दिर समेत यस पटक खुलेन । राष्ट्रपति, प्रधानमन्त्री, पूर्वराजा लगायतले सर्वसाधारणलाइ टीका जमरा लगाइदिने कार्यक्रम समेत हुन सकेन ।
