तितोपाटी – नेपाल सरकारले शुक्रबारदेखि लागू हुने गरी उडान कोटा हटाएको छ । रोजगार कटौतीमा परेर र करार अवधि सकिएर पनि महिनौंदेखि कुरिरहेका नेपालीले प्रवासी भूमिमा सरकारविरुद्ध नारा लगाउन थालेपछि दवावमा परेको सरकारले बिहीबार उडान संख्या थप गर्न अनुमति दिइएको हो । यसअघि सरकारले दिनमा ८ सय जना मात्रै कोटा तोकेको थियो । अब पीसीआर परीक्षण सहज भएका मुलुकबाट विदेशी तथा स्वदेशी वायुसेवा कम्पनीलाई मागे जति उडान अनुमति दिइने भएको छ । सरकारले १० दिनअघि अन्तर्राष्ट्रियतर्फ आंशिक नियमित उडान खुला गरेको थियो ।
उपप्रधान तथा रक्षामन्त्री ईश्वर पोखरेल, परराष्ट्रमन्त्री प्रदीप ज्ञवाली, पर्यटनमन्त्री योगेश भट्टराई र श्रममन्त्री रामेश्वर राय यादवबीच भएको छलफलपछि प्रधानमन्त्री केपी शर्मा ओली र उपप्रधानमन्त्री पोखरेलबीचको उच्चस्तरीय परामर्शबाट अन्तर्राष्ट्रिय उडान संख्या थप गर्ने समझदारी भएको हो । यसरी स्वदेश फर्कनेहरू पीसीआर रिपोर्ट नेगेटिभ भएकाहरू हुनुपर्दछ । विदेशमा गरेको पीसीआर रिपोर्ट नेगेटिभ भएकाहरूले काठमाण्डाैंमा अवतरण गरेपछि होटल क्वारेन्टाइनमा बस्नु पर्दैन सिधै होम क्वारेन्टाइमा जान सकिन्छ । यदि कुनै एयरलाइन्सले पीसीआर रिपोर्ट नेगेटिभ र पोजिटिभ भएका यात्रुलाइ सँगै ल्याएमा भने उक्त विमानका सबै यात्रु होटल क्वारेन्टाइनमा बस्नु पर्दछ ।
यस अघि विदेश स्थित कतिपय कम्पनीहरूले अाफ्नै खर्चमा विमान चार्टर गरि नेपाली श्रमिकलाइ नेपाल पठाउन अनुमति मागे पनि सरकारले अनुमति दिएको थिएन । यो निर्णय पश्चात त्यस्ता कम्पनीले आफ्नै खर्चमा चार्टर गरी श्रमिक पठाउन पाउने छन् । अब उप्रान्त त्यस्ता कम्पनीहरूलाइ प्राथमिकतामा राखेर उडान अनुमति दिइने छ ।
अहिलेको निर्णयले युरोप तथा अमेरिकालगायत पीसीआर सहज भएका मुलुकमा ५ महिनादेखि अलपत्र परेका नेपालीलाई स्वदेश फर्कन सजिलो हुने निश्चित छ । सरकारले पर्यटकलाई भने अझै नेपाल आउन अनुमति दिइसकेको छैन तर नेपालमा कूटनैतिक नियोग, दूतावास, अन्तर्राष्ट्रिय विकास साझेदार संस्था, संयुक्त राष्ट्र संघका नियोगमा कार्यरत कर्मचारी र तीनका परिवारलाई भने पीसीआर तथा भिषाका आधारमा आउन छुट नै छ ।
बिहीबारसम्म त्रिभुवन अन्तर्राष्ट्रिय विमानस्थलमा अन्तर्राष्ट्रिय यात्रु ल्याउन बिहान ६ देखि बेलुकी ६ बजेसम्म समयसीमा थियो । अब त्यो सीमा पनि हट्ने छ ।
