तितोपाटी – विश्वव्यापी महामारीको रूपमा सिंगो विश्वलाइ नै चपेटामा पारिरहेको कोभिड-19 नोवल कोरोना भाइरसको कारण विदेशमा रहेका १९५ जना नेपालीको मृत्यु भएको छ । गैरआवासीय नेपाली संघ अन्तर्गतको स्वास्थ्य समितिका अनुसार शनिवार साँझसम्म विदेशमा मात्र १६ देशमा १९५ जना नेपालीहरुको निधन भएको हो ।
समितिका अनुसार कोरोना संक्रमणबाट विदेशमा यो साता मात्रै थप ३ जना नेपालीको निधन भएको छ । यो साता बेलायतमा १ जना र युएईमा २ जनाको ज्यान गएको हो ।
हाल साउथ अफ्रिका, पोर्चुगल, स्पेन, कतार साउदी अरब लगायतका देशमा कोरोना संक्रमण सामान्य वृद्धि भएको छ । अष्ट्रेलिया र युरोपका केही देशमा कोभिड–१९ को दोस्रो वेभ (दोस्रो लहर) सुरु भएपछि नेपाली समुदायमा संक्रमण सामान्य रुपमा बढेको हो । हालसम्म विश्वका ३८ देशमा रहेका नेपालीहरु कोरोना भाइरसबाट संक्रमित भएका छन् ।
अहिले सम्म बेलायत, अमेरिका, युएई, साउदी अरब, बहराइन, कुवेत, कतार, ओमान, आयरल्याण्ड, जापान, टर्की, नेदरल्याण्ड, स्वीडेन, भारत, साउथ अफ्रिका लगायत १६ देशमा रहेका नेपालीहरुको ज्यान गएको हो । हालसम्म नेपालबाहेक विदेशमा मात्र ३४ हजार ७ सय १ जनामा कोरोना संक्रमण देखिएको छ । ३२ हजार ५ सय ११ जना कोरोना संक्रमणबाट मुक्त भएको स्वास्थ्य समितिले जनाएको छ ।
