तितोपाटी – नेपालमा कोरोना संक्रमणको कारण पछिल्लो २४ घण्टामा ७ जनाको मृत्यु भएको छ भने अहिले सम्म कोरोनाको कारण मर्नेको संख्या ११४ पुगेको छ । स्वास्थ्य तथा जनसंख्या मन्त्रालयले मिडिया ब्रिफिङमा जनाए अनुसार मृतकहरू काभ्रे, नवलपरासी, मोरङ, बाँके, धनुषा र कास्कीका १ –१ जना पुरुष रहेका छन् भने तनहुँकी एक महिला रहेकी छिन् ।
मुत्यु हुनेहरूको विवरण यस प्रकार रहेको छः
काभ्रे जिल्लाको धुलिखेल नगरपालिका घर काठमाण्डू बानेश्वर निवासी ८९ वर्षीय एक पुरुषको भाद्र १ गते राति धुलिखेल अस्पतालमा निधन भएको थियो। उनलाई दम तथा पिसावसम्बन्धी समस्या भई साउन २८ गते धुलिखेलमा भर्ना गरिको थियो। उनमा साउन २७ गते कोभिड-१९ पुष्टि भएको थियो।
नवलपरासी जिल्लाको रामग्राम निवासी ३७ वर्षीय पुरुषको भाद्र २ गते बिहान ललितपुरमा पाटन स्वास्थ्य विज्ञान प्रतिष्ठान निधन भएको हो। उनलाई कडा निमोनिया तथा हाइपोथाइरोडिजम भई साउन ३० गते पाटन अस्पतालको आईसीयूमा भर्ना गरिएको थियो। उनलाई साउन २९ गते कोभिड-१९ पुष्टि भएको थियो।
मोरङ जिल्लाको विराटनगर निवासी ४७ वर्षीय पुरुषको भाद्र १ गते कोशी अस्पतालमा निधन भएको हो। क्षयरोग भएका ती व्यक्ति ज्वरो, निमोनिया तथा श्वासप्रश्वासमा समस्या भई साउन ३२ गते कोशी अस्पतालको आइसोलेसनमा भर्ना भएका थिए। भाद्र १ गते परीक्षण गर्दा उनमा सङ्क्रमण पुष्टि भएको थियो।
बाँके जिल्लाको नेपालगन्ज निवासी ६२ वर्षीय पुरुषको भाद्र १ गते राति नेपालगन्ज मेडिकल कलेजमा निधन भएको थियो। उनलाई ज्वरो, निमोनिया तथा श्वासप्रश्वासमा समस्या भई साउन ३२ गते अस्पतालमा भर्ना गरिएको थियो। उनको भाद्र १ गते नमुना सङ्कलन गरी परीक्षण गर्दा सोही दिन कोभिड-१९ पुष्टि भएको थियो।
धनुषा जिल्लाको धनौजी निवासी ६५ वर्षीय पुरुषको भाद्र १ गते प्रादेशिक अस्पताल जनकपुरमा निधन भएको थियो। उनी पनि श्वासप्रश्वासमा समस्या आई साउन ३० गते अस्पताल गएका थिए। उनको साउन २६ गते सङ्कलन भएकोमा साउन ३० गते कोभिड-१९ पुष्टि भएको थियो। उनी मोटोपनबाट पनि ग्रसित थिए।
कास्कीको पोखरा निवासी ८७ वर्षीय पुरुषको भाद्र २ गते बिहान पोखरा स्वास्थ्य विज्ञान प्रतिष्ठानमा भएको थियो। उनी मधुमेह तथा मिर्गौलाको समस्याबाट पीडित थिए। भाद्र १ गते अस्पलाम भर्ना भएका थिए। उनको साउन ३२ गते नमुना सङ्कलन गरी परिक्षण गर्दा भाद्र १ गते कोभिड-१९ पुष्टि भएको थियो।
तनहुँ जिल्लाको व्यास नगरपालिका निवासी ५० वर्षीया महिलाको भाद्र १ गते राति पोखरास्थित सेवा अस्पतालमा निधन भएको थियो। उनी ज्वरो, निमोनिया तथा श्वासप्रश्वासमा समस्या भई साउन ३२ गते अस्पतालमा भर्ना भएकी थिइन्। उनको भाद्र १ गते सङ्कलन गरी परीक्षण गर्दा सोही दिन कोभिड-१९ पुष्टि भएको थियो। उनी मधुमेह, उच्च रक्तचाप तथा दमसम्बन्धी रोगबाट पीडित थिइन्।
