तितोपाटी – नेकपाका सांसदले आइतबार सिंहदरबारमा कार्यक्रम आयोजना गरी पार्टी फुट्नु कुनै हालतमा उचित नभएको बताएका छन् ।उनीहरूले पार्टी विभाजन गर्न नहुने भन्दै हस्ताक्षर अभियान चलाएका छन् । कार्यक्रममा बोल्दै सांसद विशाल भट्टराईले भने, ‘अहिले हस्ताक्षर अभियान सञ्चालन गऱ्याैँ, आवश्यक परे पार्टी कार्यालय र नेताहरूको घरमा धर्नासमेत दिनेछौँ । यो झगडा गरेर जुन गाईजात्राजस्तो भइरहेको छ, यो उचित छैन।’ त्यस्तै, रामकुमारी झाँक्रीले अहिले पार्टी विभाजन गरेर फेरि यस्तै ठूलो पार्टी निर्माण गर्न कठिनाइ हुने बताइन् । उनले भनिन्, ‘अहिले पार्टी विभाजन गरेर सानो बोर्ड झुन्डाएको अर्काे पार्टी त बन्ला, तर मुलुक हाँक्ने पार्टी बन्दैन ।’
सुदृढ पार्टी एकीकरणका लागि दबाब दिनुपरेको सांसद सुरेशकुमार राईले बताए । उनले भने, ‘सुदृढ एकताका निम्ति सांसदहरूको तर्फबाट सिंगो देशवासी र पार्टीका माथिदेखि तलसम्मका सबैलाई अपिल गरेका छौँ।’
सांसद गणेश पहाडीले नेतृत्वले एक ठाउँमा बसेर विधि, प्रक्रिया र प्रणालीभित्र बसेर समस्या समाधान नगरे दोस्रो चरणमा समाधानको विकल्पसहित हस्तक्षेपकारी भूमिका खेल्ने बताए । उनले अहिले पार्टीभित्रको अन्तरविरोधलाई लिएर सडकमा भइरहेको पक्ष–विपक्षको नारा, जुलुस बन्द गर्नुपर्नेमा पनि जोड दिए ।
कार्यक्रममा गणेश पहाडी, सुरेश राई, पार्वती विशुङ्खे, कृष्णप्रसाद दहाल, जीवनराम श्रेष्ठलगायतका सांसदहरूको उपस्थिति थियो।
केन्द्रीय सचिवालयका नेताहरू, स्थायी कमिटी सदस्य र मन्त्रीहरूबाहेकले एकताको दबाबका लागि हस्ताक्षर गरेका छन् ।
अभियानमा ६१ जना सांसदहरूले हस्ताक्षर गरेका छन्।
हेर्नुहाेस् हस्ताक्षर गर्ने सांसदहरुकाे सूची :-
-नयाँपत्रिका दैनिकबाट
