महल र झुपडी फरक भएर के भो बस्ने बास एउटै हो ।
घराना उच्चनिच फरक भनेर के भो फेर्ने श्वास एउटै हो ।।
फुर्सद कसैलाई पनि छैन हेर बुझिदिने कसले यो कुरा
धनी र गरिब फरक भएर के भो जिउने आश एउटै हो ।।
संसार भर सृष्टि रच्यो ईश्वरले मानव नामको सबै बराबर
वर्ण छालाको फरक भएर के भो रगतको रंग खास एउटै हो ।।
धन हुनेले भोग गर्दछन सबै सुख-सयल पैसाले बाँचुन्जेल तर
चिता चन्दनको बनेर के भो मृत्यु पछि नाम त’लास’एउटै हो ।।
कमाउने होडमा सिमाना मिचेर अकुत आर्जनले सम्पत्ति मात्रै
धेरै ढुकुटीमा भरेर के भो छैन स्वतन्त्र धनकै दास एउटै हो ।।
कसैको पनि मन शान्ति छैन किन हरपल सम्पत्ति कै ध्यानमा
जिवन रंगिन भएर के भो सोच्दछ मात्र धनको राश एउटै हो ।।
