आमा
१
जन्मदिने आमा पाइदैन संसार डुलेर ।
आमाले माया गर्नुहुन्छ भित्री मन खोलेर ।।
बच्चा ठूलो भएपछी पहिला भन्छ आमा ।
चोटपटक, दु:ख पर्दा पहिलो वचन आमा ।।
२
जसो तसो फकाएर खुवाउनु भो खाना ।
माया गरि बोलाउनु भो भनि सानु, साना ।।
चिसोमा आफू सुति सुताउनु भो तातो खोजी ।
के खाला भनी खुवाउनु भो मीठो रोजी रोजी ।।
३
लुतो आउँछ भनी खेलाउन दिनुभएन माटो ।
नुहाईदिँदा भन्नुहुन्थो सातो आयो सातो ।।
मेला पात जाँदा घरकै चिन्ता लिने बानी ।
मैले पनि दुःख दिएँ होला जानी नजानी ।।
४
हिँड्न सिकाउनु भयो ताते ताते गर्दै ।
लेख्न,पढ्न सिकाउनु भो क,ख,ग,घ भन्दै ।।
दिशा पिसाब सोर्नु भयो नमानेर घिन ।
मेरै लागि काम गर्नु भो दिन प्रति दिन ।।
५
आशीर्वाद दिनुस आमा जित्छु संसार ।
महिमा छ हजुरको अपार अपार ।।
आमाको आदर सम्मान गर्नुपर्छ हेर ।
आमाको मन जितेको जान्न कहिलै खेर ।।
६
मलाई खुवाउनु भो आफुले खाई नखाई ।
रातदिन हेरचाह गर्नु भो काम छोडी मलाई ।।
मातृप्रेम संसारकै सबैभन्दा ठूलो रैछ जान ।
आमालाई संसारकै महान ब्यक्ती ठान ।।
सुशिल बस्याल
बगनासकाली ८ बेलौतिखरक पाल्पा,नेपाल
