पूर्वराजा ज्ञानेन्द्र शाहले देशमा जातीयता, वर्गीयता र क्षेत्रीयताको संकीर्ण दुर्भावना फैलिएको भन्दै सरकारप्रति चार प्रश्न गरेका छन् । बुधबार वक्तव्य जारी गरी पूर्वराजा शाहले बदलिँदो विश्व व्यवस्था बुझेर आफ्नै पद्धतिमा फर्किनुपर्नेमा जोड दिएका छन् । उनले आफ्नो पद्धति के हो भन्नेचाहिँ स्पष्ट पारेका छैनन् ।
पूर्वराजाले भनेका छन्, ‘बदलिँदो विश्व व्यवस्थालाई बुझेर अब हामीले हाम्रो आफ्नो प्रकृति, रीति–संस्कृति र पद्धतितिर फर्कनु जरुरी देखिन्छ । यसबाट नै हाम्रो स्वाभिमान र स्वावलम्बनको परिपाटी फेरि कायम हुन्छ ।’
पूर्वराजा ज्ञानेन्द्रले थपेका छन्, ‘केही दशकअघिसम्म आफ्नै गौरवगाथा, मौलिक मान्यता र आर्थिक क्षमतामा उभिएको देशको शिर फेरि ठाडो पार्नुपरेको छ ।’ पूर्वराजाले आरोप–प्रत्यारोप वा निषेध र प्रतिशोधको भावना नराख्न पनि सबैमा आह्वान गरेका छन् ।
उनले भनेका छन्, ‘नेपाल राष्ट्रको एकीकरण, नेपालको स्वाधीनताको संरक्षण र सर्वत्तोमुखी विकासको चिन्तन कहिले, कसले र कोबाट भयो, त्यो आमहेक्काको विषय भइसक्यो । त्यस्तो गौरवमय इतिहासलाई स्वीकार गरेर जान सक्नुपर्दछ ।’
पूर्वराजा ज्ञानेन्द्रले अहिले मुलुकमा विभिन्न प्रश्न उब्जिएको भन्दै चिन्ता र चासो व्यक्त गरेका छन् । ‘हाम्रो देशभक्ति, स्वाधीन स्थिति र स्वाभिमानमाथि बारम्बार किन प्रश्न, सन्देह र विवाद, विग्रह उत्पन्न हुन्छ ?’ पूर्वराजा शाहले प्रश्न गरेका छन्, ‘जनताको सुरक्षा, स्वास्थ्य, जीविकाका विषयमा किन अलमल, असन्तोष र आक्रोश उठिरहन्छ ? रोगको महामारी, राष्ट्रियताको संकट, सीमा समस्या, राष्ट्रहितविरुद्धका सन्धि–सम्झौता तथा हत्या हिंसा र आत्महत्याजस्ता जल्दाबल्दा दुःखद विषय सन्दर्भमा पनि किन सधैँभरि विवाद आइरहन्छ ?’
पूर्वराजाले भ्रष्टाचार, लापरबाही, पक्षपात र भेदभावका कुरा किन दिनहुँ उठिरहन्छ भनेर पनि प्रश्न गरेका छन् । उनको थप प्रश्न छ, ‘यस्ता यावत् विषयलाई लिएर हाम्रा होनाहार युवाहरू तमाम देशभक्त स्वतन्त्र नागरिकहरू सडक–संघर्षमा किन उत्रिरहनुपर्ने अवस्था सिर्जना भइरहन्छ ?’ पूर्वराजाले मुलुकमा जातीयता, वर्गीयता र क्षेत्रीयताका संकीर्ण दुर्भावनाले राष्ट्रियता र ऐतिहासिक राष्ट्रिय अस्मितालाई राम्रो नगर्नेसमेत उल्लेख गरेका छन् ।
पूर्वराजा शाहले विदेशबाट कोभिड–१९को महामारीले पारेको समस्याका कारण स्वदेश फर्केकाहरूको श्रम, सीप र सामर्थ्यको सदुपयोग गर्नुपर्ने र देशभित्रै इलम, उद्यम र कामधन्दाको व्यवस्था मिलाउनुपर्नेमा पनि जोड दिएका छन् ।
-नयाँपत्रिका दैनिकबाट
