तितोपाटी – अछामको चौरपाटी गाउँपालिका शोकटस्थित कोलगैरामा ट्याक्टर दुर्घटना हुँदा ३ जनाको मृत्यु भएको छ। ४ जना घाइते भएका छन्। बुधबार बिहान से १ त ७८३९ नं ट्याक्टर दुर्घटना हुँदा सहचालक चौरपाटी गाउँपालिका-३ का रमेश साउदको घटनास्थलमा नै मृत्यु भएको हो। यस्तै दुर्घटनामा चौरपाटी गाउँपालिका -३ की लक्ष्मी साउद र काली साउदको पनि मृत्यु भएको छ।
उनीहरुमध्ये सहचालक रहेका रमेश साउदले गाउँपालिकाको दशपल्ले माविवाट यस वर्ष एसईई परीक्षा दिएका थिए भने लक्ष्मी र काली सोही विद्यालयको कक्षा ९ र ८ मा अध्ययनरत विद्यार्थी रहेको बुझिएको छ ।
लाइसेन्स नभएका सहचालक रमेशले ट्याक्टर चलाउँदा दुर्घटना भएको स्थानीयले बताएका छन्। ट्याक्टर चालक ज्ञानेन्द्र चौधरीले भने हाम फालेर ज्यान जोगाएका छन्। अन्य ४ घाइतेलाई उपचारका लागि अस्पताल पठाइएको छ।
