तीतोपाटी-सरकारले नेपालको प्रतिनिधित्व गर्दै विभिन्न राष्ट्रमा जाने राजदूतले राष्ट्रपतिसमक्ष सपथ लिनुपर्ने ब्यवस्था गरेको छ ।
गत माघ १४ गते बसेको मन्त्रिपरिषदको बैठकले राजदूत नियुक्तिसम्बन्धी निर्देशिका संशोधन गर्दै राष्ट्रपतिसमक्ष सपथ लिएर मात्रै जिम्मेवारी पाएका देशमा जानुपर्ने व्यवस्था गरेको हो ।
राजतन्त्रात्मक व्यवस्थामा राजदूतहरुले राजासमक्ष सपथ लिने व्यववस्था थियो । नेपालमा राजतन्त्रको अन्त्यसँगै यो प्रचलन हटेको थियो । तत्कालिन राष्ट्रप्रमुखको हैसियतमा गिरजाप्रसाद कोइरालाले राजदूतलाई सपथ गराउने प्रचलन कायम राख्न खोजे पनि विरोध कारण रोकिएको परराष्ट्र मामिलाका नकारहरु बताउँछन् ।
‘जसले नियुक्ति गर्छ उसैसँग सपथ लिनु राम्रो हुन्छ’, परराष्ट्रविद हिरण्यलाल श्रेष्ठ भन्छन्, ‘सरकारको यो निर्णय उचित छ ।’
कतिपय देशमा राष्ट्रप्रमुखसँग सपथ लिने व्यवस्था रहेको उल्लेख गर्दै उनले नेपालले त्यसलाई अवलम्बन गर्नु स्वागतयोग्य रहेको बताए । ‘राजाको शासनपछि के गर्ने भन्ने अन्योल थियो । अहिले क्लियर भएको छ । अन्तर्राष्ट्रिय अभ्यास पनि राष्ट्रप्रमुखसँग सपथ लिएर जाने भन्ने नै छ’ उनले अनलाइनखबरसँग भने ।
राजनीतिक विश्लेषक पुरुषोत्तम दाहाल पनि राष्ट्रको प्रतिनिधि भएर जाने राजदूतले राष्ट्रप्रमुखसँग सपथ लिनुपर्ने व्यवस्था उचित भएको बताउँछन् । सरकारले राजदूतको नाम सिफारिस गर्ने, संसदले सुनुवाई गर्ने र सुनुवाइ समितिले अनुमोदन गरेपछि राष्ट्रपतिले नियुक्त गर्ने प्रचलन छ ।
अबदेखि राष्ट्रप्रमुखसमक्ष सपथ पनि लिनुपर्ने हुन्छ । नेपालमा आउने राजदूतहरुले ओहोदाको प्रमाणपत्र राष्ट्रपति समक्ष नै पेस गर्ने चलन छ ।
साभार अनलाईनखबर
