तीतोपाटी-महोत्तरीको गौशला नगरपालिकामा रहेको एभेरेष्ट्र सुगर एन्ड केमिकल इन्डस्ट्रिज लिमिटेडका मजदुरहरुले बिहीबारदेखि अनिश्चितकालीन आमरण अनसन थालेका छन् । चिनी उद्योगले मजदुरलाई बर्षाैदेखी दिँदै आएको विशेष भत्ता,अतिरिक्त भत्ताका साथै अन्य सुविधाहरु यसै बर्षको साउन महिनादेखि कटौती गरेपछि मजदुरहरुले आईतबारदेखी चरणबद्घ रुपमा आन्दोलनका कार्यक्रम घोषणा गरेका थिए । सोही क्रममा आजदेखि मजदुरहरुले आमरण अनशन सुरु गरेका हुन् ।
आमरण अनशनको उद्घाटन महोत्तरी क्षेत्र नम्बर १, (ख) का प्रदेशसभा सदस्य भरतप्रसाद शाहले गरेका छन् । अनशन कार्यक्रमलाई सम्बोधन गर्दै उनले मजदुर हक हितको पक्षमा आफू सधैं लड्दै आएकाले मजदुर आन्दोलनमा ऐक्यबद्धता जनाउन अनशन कार्यक्रममा आएको बताए ।
सभासद् साहले मजदुरले उठाएका मुद्धाहरुलाई उद्योग व्यवस्थापन, स्थानीय सरकार, प्रदेश सरकार र नेपाल सरकारलाई आफूले ध्यानाकर्षण गराउने प्रष्ट पारे । मजदुर आन्दोलन ५ दिन बितिसक्दा पनि उद्योग व्यवस्थान पक्षले कुनै चासो नदेखाएको मजदुरहरु बताउँछन् ।
