तितोपाटी – महानगरीय ट्राफिक महाशाखाले सडक दुर्घटना कम गराउन र ट्राफिक नियम मिच्नेलार्इ सचेत गराउन जेब्रा क्रसिङ वा आकाशे पुल बाहेकको अन्य स्थानबाट बाटो काट्नेलाई २ घण्टा प्रशिक्षण दिने भएको छ । दैदल यात्रुलाई जेब्रा क्रसिङ र आकाशे पुलबाट मात्रै बाटो काट्ने बानीको विकास गर्नका लागि महानगरीय ट्राफिक प्रहरी महाशाखाले यस्तो अभियान थाल्ने भएको हो ।
महानगरीय ट्राफिक महाशाखाले सडक दुर्घटना कम गराउन र ट्राफिक नियम मिच्नेलार्इ सचेत गराउन १२ जना प्रहरी निरीक्षकलार्इ जुनियर अधिकृतसहित उपत्यकाका जेब्रा क्रस र आकाशेपूल भएका स्थानमा खटाउँदैछ । यो टोलीले जथाभावी बाटो काटिरहेकाहरूलार्इ बीच सडकबाटै समातेर फुटपाथमा ल्याउनेछ र त्यही उभ्याएर राख्नेछ । त्यसपछि बिहान १ देखि ११ र दिउँसो ४ देखि ६ बजेसम्म सडक र यात्रु सुरक्षाबारे प्रशिक्षण दिनेछ ।
महाशाखाका अनुसार हाल उपत्यकाका कोटेश्वर, ठिमी, नयाँबानेश्वर, थापाथली, पूरानो बसपार्क, केशहरमल, सिंहदरबार,गौशाला, महाराजगंज, कालीमाटी र जावलाखेल लगायतका स्थानमा जथाभावी बाटो काट्ने यात्रु समाउन ट्राफिक प्रहरी परिचालन गरिएको महाशाखाले जनाएको छ ।
