बलिउड नायिका प्रियंका चोपडा हलिउड गायक निक जोन्ससँग प्रेममा फ्रिसिन् भनेर भारतमा उनका फ्यानहरुबीच ठूलो आतंक छ । यद्यपि, प्रियंकाकी आमा मधुले भने आफ्नी छोरीले विदेशीसँग बिहे नगर्ने बताउँदै अफेयरको खन्डन गरेकी छिन् । तर, उनलाई के थाहा प्रियंका र जोन्सको प्रेम कति गहिराईमा पुगिसकेकेा छ भन्ने कुरा ।
जोन्सले प्रियंकाप्रति आफ्नो प्रेम खुलेरै प्रकट गर्न थालेका छन् । हालै प्रियंकाले इन्स्टाग्राममा एउटा फोटो सेयर गरेकी थिइन् । त्यो फोटोमा उनी आफ्ना दुई साथीहरुसँग बर्गर खाँदै मस्ति मुडमा देखिएकी छन् । जोन्सलाई यो फोटोमा प्रियंकाको हाँसोले खुबै लोभ्याएछ । उनले लेखेका छन्, ‘वाह यो मुस्कान ।’ यति मात्र नभएर उनले लभको सिम्बोल पनि राखेका छन् ।
हुन त प्रियंकाकी आमाले भनेजस्तै लभको सिम्बोल राख्दैमा लभ भएकै हुनुपर्छ भन्ने छैन । तर, यो जोडी बारम्बार लठारिएर हिँडेको अवस्थामा भेटिन थालेको छ । जोन्ससँग घुम्दा प्रियंका निकै खुशी देखिन्छिन् । पछिल्लो समय उनीहरु एउटै ब्ल्याङ्केटमा घुसि्रएको तस्वीर सार्वजनिक भएको थियो । त्यसो त एउटै ब्ल्यांकेटमा घुस्रिदैमा पनि लभ परेकै हुनुपर्छ भन्ने के छ र ?
-अनलाइनखबरबाट
