एजेन्सी | एप्पलले आफ्नो बहुप्रतिक्षित आइफोन १५ सिरिजका चार आइफोन सार्वजनिक गरेको छ ।
मंगलबार क्यालिफोर्नियास्थित मुख्यालयमा आयोजित कार्यक्रममा एप्पलले आइफोन १५ को आधारभूत मोडेलसँगै आइफोन १५ प्लस, आइफोन १५ प्रो र आइफोन १५ प्रो म्याक्स लञ्च गरेको हो ।
नयाँ आइफोनमा डिजाइन तथा फिचर्समा निकै केन्द्रित भएको एप्पलले दुबै फोनमा टाइटेनियम बडी तथा बेजलको आकार घटाएको छ भने क्यामराको गुणस्तरलाई निकै उत्कृष्ट बनाएको दाबी गरेको छ ।
यसपटक एप्पलले आइफोनमा गरेको सबैभन्दा ठूलो परिवर्तन भनेको युएसबी टाइप सी पोर्ट राख्नु नै हो । एप्पलले पहिलोपटक आफ्नो आइफोनमा टाइप सी पोर्ट राखेको छ । यो सँगै अब प्रयोगकर्ताले एन्ड्रोइड फोनको चार्जर केबलबाट समेत आइफोन चार्ज गर्न सक्नेछन् ।
आइफोन १५ प्रो मोडेलमा एक्सन बटनको प्रयोग गरिएको छ, जसले प्रयोगकर्तालाई विभिन्न काममा सरलीकरण गर्नेछ । यो बटनमा प्रयोगकर्ताले विभिन्न कमान्ड सेट गर्न सक्दछन् । प्रयोगकर्ताका लागि यो निकै उपयोगी हुने विश्वास एप्पलको छ ।
यस्ता छन् फिचर्स
आइफोन १५ प्रो सिरिजमा दुईवटा ह्याण्डसेट आएका छन् र दुबैको आकार फरक–फरक छ । आइफोन १५ प्रो मा ६.१ इन्चको डिस्प्ले रहेको छ भने आइफोन १५ प्रो म्याक्समा ६.७ इन्चको स्क्रिन रहेको छ । दुबैमा १२० हर्जको रिफ्रेस रेट रहेको छ, जुन गेमिङ तथा स्क्रोलिङका लागि निकै उपयोगी हुनेछ ।
त्यस्तै आइफोन १५ मा ६.१ इन्चको डिस्प्ले रहेको छ भने आइफोन १५ प्लसमा ६.७ इन्चको डिस्प्ले रहेको छ ।
आइफोन १५ प्रो सिरिजमा ब्याक प्यानलमा ट्रिपल क्यामरा सेटअप रहेको छ । यसमा प्राइमरी क्यामरा लेन्स ४८ मेगापिक्सेलको रहेको छ । उक्त क्यामरा सेटअपसँगै दोस्रो पुस्ताको सेन्सर सिफ्ट ओआईएस समेत रहेको छ ।
अप्टिकल जुमसँगै फोकसका लागि लिडार स्क्यानर समेत राखिएको छ जसले कमजोर प्रकाशमा समेत राम्रो तस्वीर खिच्नमा सहयोग गर्दछ । अन्य दुई क्यामरामा एउटा अल्ट्रा वाइड एंगल क्यामेरा र तेस्रो म्याक्रो क्यामेरा सेन्सर रहेका छन् ।
आधारभूत आइफोन १५ मोडेलमा समेत ४८ मेगापिक्सेलको मुख्य क्यामरा रहेको छ । आइफोन १५ को आधारभूत मोडेलमा ए १६ चिप रहेको छ भने अन्य मोडेलमा ए १७ चिप रहेको छ ।
मूल्य कति ?
आइफोन १५ प्रोको सूरुवाती मूल्य ९९९ डलर तोकिएको छ । त्यस्तै आइफोन १५ प्रो म्याक्सको मूल्य ११ सय ९९ डलर राखिएको छ ।
त्यस्तै आइफोन १५ को सुरुवाती मूल्य ७९९ डलर रहँदा आइफोन १५ प्लसको ८९९ रहेको छ ।
आइफोन १५ विभिन्न ५ वटा रङमा उपलब्ध हुनेछ । चारवटै आइफोन सेप्टेम्बर १५ बाट प्रिअर्डरका लागि उपलब्ध हुने र सेप्टेम्बर २२ मा बजारमा पठाउने एप्पलले जनाएको छ ।
