बि. आर. उप्रेती – बहुदलिय शासन प्रणाली राम्रो मानिएको तर यस शासन प्रणालीमा निर्वाचन, सत्ता संचालन, प्रमुख कार्यकारी निकाय लगायत विविध क्रियाकलापमा भरपर्दो रहेछ राष्ट्रको विकास तथा जनताको सुख शान्तिका अवस्था । किनभने २०४६ सालमा कयौं नेपाली वीर सपुतहरुको वलिदान पश्चात बहुदलिय शासन प्रणाली तीन दशक भन्दा बढी अवधि व्यतीत भइ सक्यो । यस बीचमा नेपालीहरुको गाँस, बास, कपास जस्ता आधारभूत आवश्यकता देखि लिएर राष्ट्रमा ठूला राष्ट्रिय गौरवका के कस्ता काम भए त ? जब कि त्यस्ता काम सम्पन्न भइ जनताहरुले राहत प्राप्त भएको महशुस हुनुपर्ने ।
यसरी बहुदलिय शासन प्रणाली अन्तरगत गत तीन दशक भन्दा बढी अवधिमा राष्ट्र र जनताले क्रमिक रुपमा सुखको सास फेर्नुको बदला जनताहरुलाई गाँस, बास, कपास, स्वास्थ्य, शिक्षा, सुरक्षा जस्ता आधारभूत अति आवश्यकता पुरा भइ आमनचैन गरेको अनुभव खोइ त ? देशमा निर्वाचन हुन्छ, नेताहरू टिकट हात पार्न तँछाडमछाड गर्छन् , अनि अनेकौं झुटा आश्वासन र प्रलोभन दिएर भोट हत्याउन सफल हुन्छन् अनि ती घोषणा पत्रमा आफुले गरेका प्रतिज्ञा भुल्छ्न् । सत्तामा नपुगुन्जेल, भोट नपाइन्जेल युवाहरू फकाउन यस्ता यस्ता प्रलोभन दिन्छन्, जस्तै: अब युवाहरुले विदेश जानु पर्दैन, स्वदेशमा नै रोजगारको व्यवस्था गर्छौं, गाँस, बास, कपास लगायतका यावत कुराहरुको ग्यारेन्टी हुन्छ भनी अक्सर सबै पार्टीका घोषणा पत्रमा उल्लेख हुन्छन् । जब विजयी भएर सत्तामा पुग्छन् सबै कुरा बिर्सन्छ्न् । गाँस, बास, कपास, शिक्षा, स्वास्थ, सुरक्षा जस्ता कुराको राहत त कता हो कता, झन् हत्या, हिंसा, बलात्कार जस्ता जघन्य अपराध पटक-पटक देशमा भइ रहेको देखिन्छ, वैदेशिक रोजगारीमा गएका कति ती विचरा नेपालीहरु बाकसमा फर्किनु परिरहेका छन् । यी कुरा सर्वविधितै छ ।
जब अनेक प्रपञ्च मिलाएर सत्तामा पुग्छन् अनि आर्थिक लाभ कसरी हुन्छ? पक्ष विपक्षको केही मत्लब छैन, कसरी हुन्छ बहुमत जमाउने, सत्तामा पुग्ने र मजासँग देशको ढुकुटी रित्याउने भन्ने सोचमा लिप्त हुन्छन्, आफ्ना आफन्तहरु मात्र विशिष्ट ओहोदामा पुर्याउँछन् । सत्ता लुछाचुडी गर्न गठबन्धन सरकार बनाउने यस्ता कार्यहरु हानाथापसँग गरिरहेकाछन् । सबै नेताहरूका यस्ता चर्चा देशका कुना काप्चा गाउँ शहर जतासुकै भएको बुझिन्छ तर कार्यकर्ताहरु चुक्क बोल्ने हिम्मत गर्दैनन् । होशियार! नेताहरु निर्वाचनको दिन नजिकिंदै हुँदा विगतमा आ-आफ्ना के कस्ता क्रियाकलापहरु छन् राम्रा कुरा वा कमि कमजोरी के कस्ता छन् सच्याउनु अनि पुरा गर्न सक्ने यथार्थ आश्वासन मात्र दिनुहोस् । जनताहरु पनि पुरा गर्न सक्ने आश्वासनको मात्र प्रतीक्षा गर्छन् ।
हाल: बारा, नेपाल
सम्पादन : केदार नाथ खरेल
