तितोपाटी – विश्वव्यापी महामारीको रूपमा कोभिड-19 नोवल कोरोना भाइरसले सबैलाइ चिन्तित बनाइरहेको बेला यतिखेर नेपालमा सलह किराको प्रवेशले कृषि क्षेत्रलाइ नराम्ररी गाँजेको छ । यसै हप्तामात्र भारतबाट नेपाल पसेको सलह किरा अहिले सम्म नेपालका एक तिहाइ जिल्लामा पुगिसकेको छ । फट्याङ्ग्रा प्रजातीको सलह हाम्रो खेतबारीमा पाइने फट्याङ्ग्रा भन्दा ठुलो हुन्छ भने एकै ठाउँमा मात्र नबस्ने सलह ठुलो झुण्डमा हिँड्ने गर्दछ ।
सलहले मकै, धान, केरा खेती तथा तरकारी र पोसिलो घाँसमा समेत क्षति पुर्याएको खबरहरू फैलिरहेका छन् भने क्षतिको अनुमान नभइसके पनि प्रारम्भिक रुपमा बालीहरुमा सलहले असर पुर्याएको सलह सूचना केन्द्रले जनाएको छ । नेपालमा शनिबार बिहान रुपन्देहीको भैरहवा, बारा, पर्सा, सर्लाही, मकवानपुर र कपिलवस्तुबाट भित्रिएको ठूलो झुण्डको सलह नै तितरबितर भएर उडिरहेको केन्द्रले जनाएको छ ।
अहिलेसम्म सलह बारा, पार्सा, रौतहट, सर्लाही, महोत्तरी, सिन्धुली, पाँचथर, उदयपुर, खोटाङ, काभ्रे, रामेछाप, काठमाडौं, चितवन, रुपन्देही, कपिलवस्तु, पाल्पा, स्याङ्जा, गुल्मी, कास्की, दाङ, प्युठान, रोल्पा र कैलालीमा सानो संख्यामा सलह भेटिएको छ ।
मकवानपुरमा हजार रोपनी मकैबालीमा क्षति
सलहका कारण भर्खरै रोपेको धानदेखि मकै, तरकारी तथा जंगलको हरियालीमा क्षति पुगेको केन्द्रले जनाएको छ ।
सलहले मकवानपुरको बकैया र हेटौडामा एक हजार रोपनीमा लगाइएको मकै खेतीमा क्षति पुर्याएको सूचना केन्द्रले जनाएको छ ।
यस्तै बारा, पर्सा, रौतहट र सर्लाहीमा सलहले पोसिलो घाँस खेतीमा मात्रै असर पुर्याएको छ । सलहले महोत्तरीमा तरकारी लगायतका बाली नष्ट गरेको छ ।
चितवनको कालीका, शक्तिखोर तथा रत्ननगरमा बिउ तथा भर्खरै रोपेको धानबालीमा क्षति पुर्याएको केन्द्रले जनाएको छ ।
सिन्धुलीमा जंगल, रुपन्देहीमा केही तरकारी बाली तथा मकै, कपिलवस्तुमा तरकारीबाली तथा धान, पाल्पामा केही बाली तथा जंगल, स्याङ्जामा केराखेती, दाङमा रोपिएको धान, कास्कीमा घाँसे मैदान र कैलालीमा मकैखेती तथा जंगलको रुखमा सलहले क्षति पुर्याएको केन्द्रले जनाएको छ ।
