तितोपाटी – लकडाउन उल्लंघन गर्दै सीमा वारपार गर्न खोज्ने ११ बंगाली मुसलमानलाई सोमबार घेराबन्दीमा पारी प्रहरीको जिम्मा लगाइएको छ । उनीहरूलाई दसगजा नजिकको मनरा सिसवा नगरपालिका–८ स्थित सहसराम र बथनाहाबीचको बगंैचामा लुकिबसेको अवस्थामा देखेपछि गाउँलेले सुरक्षाकर्मीलाई खबर गरेका थिए ।
वडाध्यक्ष बलिराम रायका अनुसार बिहान करिब ६ बजेतिर दसगजा आसपासका क्षेत्रमा अपरिचत व्यक्ति सीमापार गर्ने नियतले लुकिबसेको सूचनाका आधारमा गाउँलेले बगंैचामा घेराबन्दीमा पारेका थिए । दसगजा र बगैचाको दूरी करिब दुई सय मिटर छ । पक्राउ परेका एघारैजना मुस्लिम समुदायका हुन् ।
ठेगाना भारतको पश्चिम बंगाल बताएका उनीहरूले लामो समयदेखि लकडाउनमा परेर दिक्दार भएका बेला भारत सरकारले रेलवे सेवा खोलेको जानकारीपछि आफूहरू चोरबाटो हुँदै भारत प्रवेश गर्न खोजेको जनाएका छन् ।
