अर्काको नाममा रहेको चेक अनधिकृत रूपमा प्रयोग गरी लाखौँ रुपैयाँ झिक्ने एक युवालाई मोरङ प्रहरीले पक्राउ गरेको छ ।
झापाको बुद्धशान्ति गाउँपालिका १ बस्ने २४ वर्षीय विनय धिमाललाई इलका प्रहरी कार्यालय रानी विराटनगरले पक्राउ गरेको हो ।
विराटनगरकी पूजा विश्वकर्माले एक वर्ष दुबईमा बसेर कमाएको चार लाख १५ हजार रुपैयाँ पूजाको चेकमा नक्कली हस्ताक्षर गरी उनकै मिल्ने साथी विनयले विभिन्न मितिमा झिकेका थिए । पूजाको नाममा रहेको बैंक खाताबाट लाखौं रुपैयाँ विराटनगरमा शाखा कार्यालय रहेको हिमालयन बैंक लिमिटेडबाट झिक्ने धिमाललाई विराटनगरबाट पक्राउ गरेको इलाका प्रहरी कार्यालय रानी विराटनगरका प्रहरी निरीक्षक सन्तोष निरौलाले जानकारी दिए ।
‘प्रारम्भिक चरणको बयानमा निजले लाखौँ रुपैयाँ फरक–फरक मितिमा झकेको देखिन्छ,’ रानीका प्रहरी प्रमुख निरौलाले भने,’ रकम झिकेको बयानको क्रममा प्रतिवादीले स्वीकार गरेका छन् । ’ प्रहरीले उनलाई बैंकिङ कसुर अपराध मुद्दामा उच्च अदालत विराटनगरमा ७ दिनको म्याद थप गरी अनुसन्धान गरिरहेको छ । बैंकिङ कुसर मुद्दा जिल्ला अदालतले नहेर्ने भएकोले उच्च अदालतमा म्याद थप गरिएको हो । यसरी निकालियो रकम पूजा र विनय मिल्ने साथी हुन् ।
विवाहित विनय विराटनगरमा सिटी रिक्सा चलाउने काम गर्थे । सारोगाह्रो गर्दा पूजाले विनयलाई सहयोग पनि गर्दै आएकी थिइन् ।
वैदेशिक रोजगारको लागि दुबई जाने तयारीमा रहेकी थिइन, पूजा । उनको भिषा आएपछि २०७४ असार ७ गते विदेश जाने भइन् । घरबाट विदेश जान आफूलाई चाहिने आवश्यक सामाग्री लिएर घरबाट विनयको सिटी सफारीमा विराटनगर एयपोर्टसम्म गइन् । एयरपोर्टमा ब्याग खोलेर हेर्दा हिमालय बैंकको चेकबुक भेटेपछि पूजाले चेक घरमा लगेर छाडिदिन विनयको हातमा चेकबुक थमाइदिइन् । राम्रोसँग चिनजान भएकोले विनयको विश्वास गरेर चेकबुक दिएकी थिइन् । तर, विनयले पूजाको आमालाई चेक नदिई आफनै साथमा राखे । चेकबुकमा सबै चेकहरू सकिएको थियो । एउटा चेक रिक्योर्स अर्डर अर्थात चेकबुक सकिएपछि अर्को चेकबुक निकाल्ने स्लिप लिएर पूजाको नक्कली हस्ताक्षर गरी विनय बैंकमा गए । अरूबेला पनि पूजासँगै पैसा निकाल्न बैंक जाने गरेका उनले पूजाको हस्ताक्षर याद गरेका थिए । पूजाले आफ्नो नाम लेखेर हस्ताक्षर गर्ने गरेको देखेको उनले दुरुस्त हस्ताक्षर गरेर बैंकबाट चेकबुक निकाले ।
लामो समय विदेश बस्दा पूजाले राम्रो पैसाँ कमाएकी थिइन् । कमाएको पैसा सबै उनले आफ्नो नाममा रहेको बैंकखातामा पठाइन् । २०७५ जेठ ४ गते विदेशबाट घर आएकी उनले बैंकमा पैसा निकाल्न जाँदा खातामा रकम नभएको जानकारी पाएपछि चकित भएकी थिइन् । दुःख गरेर कमाएको पैसा बैंकबाट हराएपछि उनको निद्राहराम नै भयो । आफूले बैंकमा रकम विदेशबाट बारम्बार पठाएको र खातामा रहक हुनुपर्ने भन्दै पूजाले बैंकको स्टेटमेन्ट निकालिन छन् । बैंक स्टेटमेन्ट हरेपछि आफूले विश्वास गरेको विनयले नै रकम निकालेको पुष्टि भयो । त्यसपछि उनी कानुनी कार्वाहीको लागि इलाका प्रहरी कार्यालय रानीमा पुगेकी थिइन् ।
