तिताेपाटी तनहुँ
म्याग्दे गाउँपालिकाले सार्वजनिक गर्यो ‘म्याग्दे गान’, स्थानीय पहिचान र भावनालाई एकसूत्रमा बाँध्ने प्रयास
तनहुँ । म्याग्दे गाउँपालिकाले आफ्नो मौलिक पहिचान, भूगोल, संस्कृति र सामुदायिक विविधतालाई समेट्दै ‘म्याग्दे गान’ तयार गरी सार्वजनिक गरेको छ। पालिकाभित्र रहेका वडाका विभिन्न स्थान, ऐतिहासिक–धार्मिक स्थल, सामाजिक संरचना र सांस्कृतिक विशेषतालाई समेटेर बनाइएको यस गानले स्थानीयवासीसँग भावनात्मक सम्बन्ध जोड्ने विश्वास लिइएको छ।
“आत्मनिर्भर समृद्ध म्याग्देको आधार, मानव विकास, कृषि, पर्यटन र पूर्वाधार” भन्ने मूल नारासहित तयार गरिएको म्याग्दे गानले पालिकाको दीर्घकालीन सोच र विकासको दिशालाई समेत स्पष्ट रूपमा प्रस्तुत गरेको छ।
गानमा अकला, चण्डी, थानी, कालिका लगायतका धार्मिक स्थल, फाँट, भञ्ज्याङ, टार र बेसीजस्ता भौगोलिक पहिचानलाई समेट्दै म्याग्दे गाउँपालिकाको प्राकृतिक सुन्दरता र सामाजिक विविधतालाई उजागर गरिएको छ।
“स्वर्ग जस्तै सुन्दर छ म्याग्दे गाउँपालिका, संस्कृति र सम्पदाको हामी हौं मालिक” भन्ने भावनात्मक शब्दहरूले स्थानीय बासिन्दाको गर्व र अपनत्वलाई प्रतिबिम्बित गरेको छ।
गानमा म्याग्देमा बसोबास गर्ने अनेक जाति, अनेक धर्म, भाषा, भेषभूषा र रहनसहन लाई गाउँपालिकाको गहना भन्दै समावेशी समाजको सन्देश दिइएको छ।
“जुट्ने छौं सधैं, उठ्ने छौं सधैं, बनी एकै ढिक्का” भन्ने पंक्तिले सामूहिक एकता र सहकार्यको भावलाई बलियो बनाएको छ।
गाउँपालिकाका जनप्रतिनिधिहरूका अनुसार म्याग्दे गान औपचारिक गीत मात्र नभई, स्थानीय पहिचान, गौरव र भावनात्मक एकताको प्रतीक हो। यस गानले आगामी दिनमा स्थानीय कार्यक्रम, शैक्षिक गतिविधि, पर्यटन प्रवर्द्धन र सार्वजनिक समारोहमा म्याग्देको चिनारी स्थापित गर्ने अपेक्षा गरिएको छ।
‘जय जय जय म्याग्दे गाउँपालिका’ भन्ने उद्घोषसँगै तयार गरिएको म्याग्दे गानले समृद्ध, आत्मनिर्भर र एकताबद्ध म्याग्दे निर्माणको सन्देश बोकेको छ।
