नारायण कोइराला, ३० पुस २०७९। पाेखराथाेक साहित्य सङ्गम पाल्पाले २३ औँ वाषिर्कोत्सवकाे अवसर पारेर साहित्यिक सँगालाे वाटिका पत्रिकाकाे लाेकार्पण, स्रष्टासम्मान र सिर्जनावाचन कार्यक्रम सम्पन्न गरेको छ । कार्यक्रम संगमका अध्यक्ष हरि भट्टराईकाे अध्यक्षतामा भएको हाे । कार्यक्रमकाे प्रमुख अतिथिका रूपमा बगनासकाली गाउँपालिकाकी प्रमुख सरस्वती चिदीलाई आमन्त्रण गरिएको थियो । विशिष्ट अतिथिका रूपमा टंक पन्थ, राजेन्द्रगाेपाल सिंह, डा. शंकर गैरे तथा वडाध्यक्ष तीर्थप्रसाद भट्टराईलाई आमन्त्रण गरिएको थियोे । दीप प्रज्ज्वलनका गरी कार्यक्रमकाे समुद्घाटन गरियो । प्रमुख अतिथिद्वारा वाटिका पत्रिकाको लाेकार्पण गरेलगत्तै चार जना स्रष्टाहरूलाई सम्मान अर्पण गरिएको हाे । सम्मानित स्रष्टाहरूमा खगेन्द्रप्रसाद बस्याल, शम्भु अर्याल, गाेमविक्रम क्षेत्री र गीता रेग्मी रहेका छन् । यसै गरी साहित्य संगमद्वारा आधारभूत तह र मावि तहका विद्यार्थीहरूका बीचमा सञ्चालन गरिएको कविता प्रतियोगितामा प्रथम, द्वितीय र तृतीय हुने विद्यार्थीहरूलाई पनि प्रमाणपत्र र पुरस्कार प्रदान गरिएको हाे ।
विमाेचित वाटिका पत्रिका वर्ष २० अंक २१ माथि प्रकाश पार्ने काम टंकप्रसाद पन्थबाट भयो । तीन सय साठी पृष्ठमा निर्मित यस अंककाे मूल भागमा सन्तानब्बे वटा लेख रचनाहरू समेटिएका छन् । अन्तर्वार्ता, जीवनी, समालोचना, लेख, निबन्ध, नियात्रा र पत्र, कथा/ लघुकथा, कविता, गीत, गजल, मुक्तक, साइनो, हाइकु आदि विधालाई समेटिएको छ । कक्षा ६ का कलिला सर्जकदेखि प्राैढ साहित्यकारहरूका रचनाले वाटिकामा स्थान पाएकाले याे वास्तवमै विविध फूलहरू फुलेको वाटिका बन्न गएको छ । स्थानीय तथा राष्ट्रमै नाम चलेका स्रष्टाहरूलाई गाेल्याउने महत्त्वपूर्ण काम वाटिकामा भएको छ । पत्रिकाकाे अन्त्य भागमा संगमकाे कार्यसमिति, विविध अक्षयकोषकाे विवरण, आजसम्मसंस्थाबाट सम्मानित व्यक्तिहरूकाे शुचि तथा दुुई सय बयानब्बे जना आजीवन सदस्यहरूकाे नामावलीसमेत प्रस्तुत गरिएको छ । कृति सङ्ग्रहणीय रूपमा आएको छ ।
कार्यक्रमकी प्रमुख अतिथि चिदीले साहित्यका माध्यमबाट बगनासकालीलाई चिनाउने काम पाेखराथाेक साहित्य सङ्गमले गरेकोमा धन्यवाद व्यक्त गरिन । समाज परिवर्तनमा साहित्यकारहरूकै प्रमुख भूमिका रहेकाे कुरालाई जाेडी विद्यालयबाटै प्रतिभाहरूलाई साहित्यमा क्रियाशील गराउन पालिकाका तर्फबाट पनि कार्यक्रम बनाएरै अगाडि बढ्नुपर्ने सन्दर्भलाई जाेड दिइन् । आएका उपयुक्त सुझावहरूलाई ग्रहण गरी कार्यान्वयन गर्ने प्रतिबद्धता व्यक्त गरी संगमकाे प्रगतिको शुभकामना व्यक्त गरिन् ।
विशिष्ट अतिथि राजेन्द्रगाेपाल सिंहले साहित्यमा लाग्नेहरूमा निरन्तरता, क्रियाशीलता र प्रतिबद्धता चाहिने कुरामा जाेड दिए । वाटिकालाई विशेष अंकका रूपमा प्रकाशित गर्न पनि उनलेे सल्लाह दिए । विशिष्ट अतिथि डा. शंकरप्रसाद गैरेले साहित्य संगमका क्रियाकलाप लाेभलाग्दा रहेको सन्दर्भ जाेडी पालिकाले सहयोग गर्दा पहिलो स्थानमा पाेखराथाेक साहित्य संगमलाई राख्नुपर्छ भन्ने विचार प्रस्तुत गरे । वडाअध्यक्ष तीर्थप्रसाद भट्टराईले संगमले आफ्नो स्थापना कालदेखि साहित्यका क्षेत्रमा गरेको याेगदान प्रशंसनीय रहेको धारणा व्यक्त गरे ।
सम्मानित स्रष्टा खगेन्द्रप्रसाद बस्यालले संस्थालाई धन्यवाद व्यक्त गरी हामीले लेखेको साहित्य सबैका लागि भयो कि भएन भन्ने प्रश्नले मलाई घचघच्याइरहन्छ भन्ने विचार व्यक्त गरे । दृश्यका माध्यमबाट जनचेतनामूलक हाइकुहरू प्रस्तुत गरे उनले । सम्मानित स्रष्टा शम्भु अर्यालले याे सम्मानले आफूलाई अझ जिम्मेवार बनाएको बाेध गरी साहित्य संगमलाई धन्यवाद प्रकट गरे । बा नहुनु शीर्षकको मार्मिक कविता पनि वाचन गरे उनले । अर्का सम्मानित स्रष्टा गाेमविक्रम क्षेत्रीले यो सम्मानले आफूलाई अझ क्रियाशील हुन प्रेरित गरेको विचारसहित संस्थालाई धन्यवाद व्यक्त गरे । सम्मानित नारी स्रष्टा गीता रेग्मीले आफै संलग्न रहेकाे संस्थाबाट सम्मानित हुन पाउँदा गाैरवकाे अनुभूति भएको विचार व्यक्त गरिन् । बन्नु है हाइहाइ शीर्षकको कविता पनि वाचन गरिन् उनले ।
स्याङ्जाका स्रष्टा मिलन समीरले पाेखराथाेकसँगकाे साहित्यिक सम्बन्धलाई झल्काई यतिबेला शीर्षकको विद्रोही चेतना पाेतिएकाे कविता वाचन गरे । सिर्जनशील साहित्यिक समाज भैरहवाका सल्लाहकार नारायणप्रसाद भण्डारीले पाेखराथाेक साहित्य संगमसँगकाे पुरानो सम्बन्धलाई उल्लेख गरी सम्माननीयज्यू हाेसियार हुनुस् शीर्षकको राष्ट्रचेतनामा आधारित कविता वाचन गरे । धवल पुस्तकालय पाल्पाका अध्यक्ष युवराज पाैड्यालले वाटिका प्रकाशनका लागि धन्यवाद व्यक्त गरि सम्मानित स्रष्टाहरूलाई बधाई ज्ञापन गरे । वाङ्मय प्रतिष्ठान पाल्पाका अध्यक्ष गाेपालप्रसाद बस्यालले शुभकामनाका साथमा प्रिय मुसा तिमीलाई आशीर्वाद छ शीर्षकको कविता प्रस्तुत गरे । पाल्पा साहित्य समाजका अध्यक्ष पुष्कर अथक रेग्मीले कार्यक्रमकाे सफलताको शुभकामना व्यक्त गरी ठेगान लायाे शीर्षकको व्यङ्ग्यात्मक गजल वाचन गरे । साहित्यकार धातानन्द शर्माले साहित्य संगमले वाटिका प्रकाशनकाे कामलाई निरन्तरता दिई अनुकरणीय काम गरेको विचार राखी केही बाछिटाहरू प्रस्तुत गरे ।
साहित्यकार हाेमनाथ शर्मा काफ्लेको व्यापारीकाे चर्तीकला शीर्षकको छन्द कवितामा राष्ट्रवादी चेतनाको सञ्चारका साथमा नेतृत्वप्रति गम्भीर रूपमा खबरदारी गरिएको थियोे । साहित्यकार आर बी निश्चलले किस्ताकिस्तामा जिन्दगी शीर्षकको कविता पाठ गरे । उनको कवितामा जीवनबाेध सल्बलाएकाे पाइयो । नारायणप्रसाद अधिकारीकाे हुटिट्याउँहरू शीर्षकको कवितामा समसामयिक अवस्थाप्रतिकाे गम्भीर कटाक्ष थियोे । आयाम कार्कीले गीत प्रस्तुत गरे । गीतका माध्यमबाट इमान नबेच्न आग्रह गरे उनले । जयप्रकाश उप्रेतीले लाेकभजन प्रस्तुत गरे । नेत्र न्याैपानेले छाेरी शीर्षकको कविता वाचन गरे । पवन भुसालले मकै र जिन्दगी शीर्षकको कविता पाठ गरे । बिम्ब अनि प्रतीकद्वारा जीवनलाई हेरिएको थियोे उनको कवितामा । रजत काेइरालाले थाहा छैन के हाे यो भावना अनाैठाे बालकाे गीत प्रस्तुत गरे । शिखा पहारीले छाड माया के गफ दिन्छाै यहाँ टेक्ने धरातल नै छैन भन्ने भावका साथमा आफ्नो रचना प्रस्तुत गरिन् । साहित्यकार जानका नेपालले माछाेमाछाे भ्यागुतो शीर्षकको कविता वाचन गरिन् ।
कार्यक्रममा उपस्थित प्रमुख अतिथि, अतिथिहरू, सम्मानित स्रष्टाहरू र सहभागीहरूलाई शब्दका माध्यमबाट स्वागत गर्ने काम संगमका उपाध्यक्ष विश्वनाथ गैरेले गरे । सम्मानित स्रष्टाहरूकाे परिचय गराउने काम काेषाध्यक्ष गाेविन्द खनालले गरे । कार्यक्रमका अध्यक्ष हरि भट्टराईले साहित्य संगममा धेरै पुस्तकहरू जम्मा भएको तर व्यवस्थापन गर्न नसकिएको समस्या प्रमुख अतिथिका रूपमा रहेकी पालिका प्रमुखलाई अवगत गराए । अग्रजहरूले अलपत्र रूपमा छाडेर गएकाले वाटिकाकाे प्रकाशनमा आफूले समस्या झेल्नुपरेको गुनासो पनि गरे उनलेे । आमन्त्रित अतिथि, सम्मानित व्यक्तित्वलगायत उपस्थित सम्पूर्णलाई धन्यवाद व्यक्त गरे । कार्यक्रमकाे सञ्चालन संगमकी सचिव जानका नेपालले गरेकी थिइन् ।
साभारः डा. टंक पन्थको फेसबुक वालबाट ।
