अविच्छिन्न यात्रा, थकित कदमहरु
अदम्य साहस पनि धर्मराउन थाल्यो
दुर्गम ढुङ्गे बाटो, घुम्ती उकालीहरु
अटल बिश्वास पनि चर्मराउन थाल्यो ।
सुगन्धित मनमोहक अस्पृश्य पुष्पहरू
पाउने अभिलाषा ओइलाउन थाल्यो
खोलानालाको पुलहरु, उकालीका चौतारीहरु
कल्पनाका महलहरु सवै भत्कन थाल्यो ।
झरनाबाट अविरल तल बज्रिने पानी जस्तै
यो जिन्दगीको अस्तित्व पनि खस्किन थाल्यो
ग्रीष्म कालमा सुकिजाने हरियाली पनि
वसन्तमा पालुवाको आश लाग्न थाल्यो ।
