रूसले युक्रेनमाथि आक्रमण शुरू गरेको तेश्रो दिन पनि आक्रमण जारी राख्यो भने आक्रमणपछि भएको भिडन्तका क्रममा अहिलेसम्म १९८ जना युक्रेनीको मृत्यु भएको छ । युक्रेनका स्वास्थ्य मन्त्री भिक्टर ल्याश्कोले नै कम्तीमा १९८ जना युक्रेनीको मृत्यु भएको पुष्टि गरेका हुन् । मारिएका मध्ये तीन जना बालबालिका पनि रहेको उनले जानकारी दिए ।
सामाजिक सञ्जाल फेसबुक मार्फत उनले दिएको जानकारी अनुसार मृतकको सङ्ख्या अझ धेरै हुन सक्ने सम्भावना रहेको छ । पछिल्लो तीन दिनदेखिको भिडन्तका क्रममा अरु एक हजार ११५ जनाको मृत्यु पनि भएको अधिकारीहरूले जनाएका छन् । घाइते भएका बालबालिकाको सङ्ख्या भने ३३ रहेको छ ।
देश जोगाउनका लागि अहिले सुरक्षाकर्मी, स्वयंसेवक र आम नागरिक पनि हतियारसहित भिडन्तमा उत्रिएका छन् । युक्रेनका राष्ट्रपति भोलोदिमिर जेलेन्स्कीलाई अमेरिकाले उद्धार गर्ने खबर पठाए पनि उनले अस्वीकार गरेका छन् । अमेरिकी सञ्चारमाध्यमहरूले नै युक्रेनबाट उनलाई उद्धार गर्ने अमेरिकाको प्रस्तावलाई उनले अस्वीकार गरेको जनाएका छन् ।
युक्रेनमा युक्रेनी र रुसी जातीय समूहबीच लामो समयदेखि विवाद रहेको छ । युक्रेनको जनसंख्याको १७ प्रतिशत रुसी छन् । त्यही जनसंख्या अहिले रुसको समर्थनमा देखिन्छ । सोभियतकालीन अन्य गणराज्यहरूमा पनि रुसी रहेका छन् । यस्तो जनसंख्या सबै ठाउँमा छरिएर रहेको छ ।
पश्चिमी भागमा बस्नेहरू आफूहरू युरोप नजिक भएको ठान्दछन् । युरोपसँग जोडिनुपर्छ भन्ने धारणा राख्छन् । पूर्वतर्फ बस्नेहरूमा भने रुससँग निकट भएको कारण मस्कोतर्फ सम्बन्धमा जोड दिन्छन्‚ जसले युक्रेनलाई विभाजित गरेको छ र त्यसले समस्या उत्पन्न गराएको हो । युक्रेन स्वतन्त्र भएदेखि नै कहिले युरोप नजिक त कहिले रूस नजिक भएकाहरूले सत्तासीन हुँदै अाएका छन् । सन २०१४ मा रूस नजिक रहेका राष्ट्रपति भिक्टर यानुकोभिकलाई युरोप निकटस्थ रहेकाहरूले अपदस्थ गरेपछि त्यहाँ समस्या चर्किएर गएको हो ।
उक्त समयमा राष्ट्रपति यानुकोभिकले युरोपेली संघसँग आर्थिक तथा सामाजिक रुपमा जोड्ने सम्झौतामा हस्ताक्षर गर्न अस्वीकार गरेपछि उनीविरुद्ध श्रृङ्खलाबद्ध विरोध प्रदर्शन भएको थियो । प्रदर्शनहरू हिंसात्मक भए । उनी देश छाडेर भाग्नुपर्यो । यानुकोभिकविरुद्ध आन्दोलनमा पश्चिमाहरूको भूमिका रहेको धारणा मस्कोको छ । सोही कारण पनि युक्रेनमा यो अबस्था सिर्जना भएको हो ।
