संयुक्त अरब इमिरेट्समा पनि कोरोनाको नयाँ भेरिएन्ट ओमिक्रोनको एक संक्रमित भेटिएको छ । त्यहाँको स्वास्थ्य तथा रोकथाम मन्त्रालय (MoHAP) ले बुधवार ओमिक्रोन संस्करणको पहिलो केस फेला परेको पुष्टि गरेको राज्य समाचार एजेन्सी WAM ले जनाएको छ । अफ्रिकी देशबाट अरब राष्ट्र हुँदै आएकी एक अफ्रिकी महिलामा ओमिक्रोनको पहिचान गरिएको थियो। उनले कोरोना बिरुद्दको दुई डोज खोप लगाएकी र स्वास्थ्य मापदन्ड पुरा गर्दै यूएई आएकी थिइन् ।
सङ्क्रमित व्यक्तिको सम्पर्कमा आएकालाई जाँच गरी अलग्गै राखिएको र बिरामीमा रोगको कुनै लक्षण नदेखिएको र आवश्यक सबै स्वास्थ्य उपायहरू भइसकेको मन्त्रालयले जनाएको छ । मन्त्रालयले पुष्टि गर्यो कि यूएई स्वास्थ्य क्षेत्र निरीक्षण र सबै आवश्यक परीक्षणहरू मार्फत सबै सक्रिय उपायहरू लिएर विभिन्न कोभिड-१९ भेरियन्टहरू सम्बोधन गर्न पूर्ण रूपमा तयार छ।
मन्त्रालयले कोभिड-१९ बाट हुने मृत्यु वा गम्भीर लक्षणहरूको प्रतिरोधात्मक क्षमता र सुरक्षा सुनिश्चित गर्न, विशेष गरी नयाँ भेरियन्टहरूको उदयलाई ध्यानमा राख्दै बुस्टर शट सहित कोभिड खोप दिइरहेको जनाएको छ ।
कोरोनाको नयाँ भेरिएन्ट ओमिक्रोन संक्रमित साउदीमा भेटिएको दोश्रो दिनमा युएइमा भेटिएको हो । दक्षिण अफ्रिकामा ओमिक्रोन भेरिएन्टका संक्रमित भेटिए लगत्तै युएइले ओमिक्रोनको संक्रमण नबढोस भनेर दक्षिण अफ्रिका, नामिबिया, लेसोथो, इस्वाटिनी, जिम्बाब्वे, बोत्सवाना र मोजाम्बिक लगायत सात देशका यात्रु र ट्रान्जिट यात्रुहरूको युएइ प्रवेशमा रोक लगाइसकेको छ ।
