मुक्तक-१
भान्साको काम एक्लै सकाउनु हुन्छ।
मिठा मिठा खानेकुरा पकाउनु हुन्छ ।
जति सताए झिज्याए पनि आमालाई,
नरिसाई उहाँले उल्टै फकाउनु हुन्छ ।
मुक्तक-२
राज्य संचालनको स्थिति हो राजनीति ।
सुशासनको व्यवस्थित रीति हो राजनीति ।
प्रयोग कसरी हुन्छ,प्रयोगकर्तामा भर पर्छ
नितिहरु मध्य सर्वोकृष्ट नीति हो राजनीति ।
मुक्तक:३
कृषिप्रधान देश मनसुनमा भर पर्नु छ ।
पानी परेको यही बेलामा खेती गर्नु छ।
वरपर छरछिमेकमा अर्म पर्म काम गरी
वर्षदिनलाई खाने अन्न भकारी भर्नु छ ।
मुक्तक:४
कहिले खडेरी कहिलेअविरल झरी छ ।
रोगव्याधी छदै छ सन्त्रास थरीथरी छ ।
कसरी मन बुझाँउ अब कसरी बाँचौ ?
समस्या नै समस्या आफ्नै वरिपरि छ ।
मुक्तक:५
गरिबहरुकै बस्तीमा पहिरो खस्छ,बाढी आउँछ ।
हरेक वर्ष रोग अनि भोकको समस्याले सताउँछ ।
वास्तविक पिडितहरुको बिचल्ली भैरहेको बेला
उता नक्कली पिडितले सरकारी राहत पाउँछ ।
-रामचन्द्र भट्टराई, स्याङ्जा
