१.
बढ्दै छ लोभको मात्रा लोभीको मनमा अझै
जसरी बढ्छ यो देह त्यसरी नै शनै शनै ।
२.
मर्नु नै जन्मिनु हो रे ’मृत्यु’ को परमार्थमा
सोचिन्छ मनले यौटा अर्कै हुन्छ यथार्थमा ।
३.
लोभी मान्छे पिछा लाग्छ रूप फेरी जताततै
छेपाराको प्रतिच्छाया देखिन्छ कि त्यहाँ कतै ।
४.
नष्ट हुन्छ स्वयं मान्छे यौटा मात्रै कुतर्कले
अरुभन्दा म नै ठूलो भन्ने तुच्छ घमण्डले ।
५.
पर्दाले छेक्न खोज्दैमा छोपिन्न मनको बह
कम्प उठ्यो भने भित्र शान्त होला र के दह ?
-विष्णु दाहाल,
इनरुवा ५, सुनसरी
